Xavi player-te Flick-a hnuaiah hlawhtling - Laporta

Barcelona president Joan Laporta chuan tun hnaia amah beitu, club legend leh coach hlui Xavi chu na takin a bei let a, "Xavi-a hnuaia tlawm ṭhin Barcelona player-te tho kha Hansi Flick-a hnuaiah chuan an hlawhtling leh lawi si a ni," a ti!

La Liga champion Barcelona hian March 15, Pathianni khian club President thar an thlang dawn a, President ni lai Laporta bakah hian Victor Font chuan President hi a chuh dawn a, Victor hi Xavi chuan a thlawp.

Xavi hian tun hnaiah Barca-in coach aṭanga an ban dawna Laporta-a'n a beih dan leh, player-te thil dik lo a hrilh dan a sawi chhuak a, Lionel Messi laklet a tum pawh Laporta-a'n a dan thu a sawi.

Barca legend Xavi chuan, "World Cup 2022 zawh khan Leo nen kan inbia a, a lo kir leh dan tur engkim kan ruahman vek tawh. President hnenah ka sawi a, anin a be zui ve bawk.

"La Liga lam pawhin min phalsak vek tawh a, mahse, Laporta khan a duh leh lo a ni," a ti a, an fapa rangkachak Messi-a'n Barca-a kir a châk em em chunga Laporta-a'n lak kir a duh loh thu a sawi.

Xavi chuan, "Laporta khan min hrilh a, Leo an lak kir chuan, a lakah a hel a, a hmingchhiat a hlau a ni," a ti! Xavi chuan, "Barca-ah hian player leh coach anga ka tih tur ka ti tawh a, ka kir tawh lo ang," a ti bawk.

Laporta chuan Xavi hi kap letin, "A na ka ti hle. Xavi thusawi ka hmuh rualin ka rilruah Flick a lo awm nghal - Xavi kha kawl reng ila, nomawi kan chawi dawn lo tih ka hria a, ka thutlukna siam sual lohzia hmuh hi a nuam a ni," a ti!

Xavi hian Barca hi November 2021 - May 2024 inkar enkawlin, La Liga leh Supercopa de Espana a lakpui a, amah thlaktu Flick hian season hmasa khan La Liga, Copa del Rey leh Supercopa de Espana-ah a champion pui.

Tun season-ah Supercopa nomawi chawi leh tawhin, Copa del Rey aṭang an tla tawh thung. Champions League-ah last 16 lut tawhin, zanin dar 1:30-ah hian Newcastle United chu first leg khel turin an lenchilh ang.