ATK tan Jobby Justin goal a tawk lo

Jobby Justin chuan Indian Super League-a a goal hmasa ber khung mah se ATK a chakpui zo lo a, an mikhualna ramah FC Goa lakah 2-1 in an tlawm - goal thum hi minute 60 aṭanga 66-na inkara lut vek a ni!

Goa hian Mourtada Fall hmangin minute 60-naah an khung a, Jobby hian minute li liam hnuah a sut. Mahse, ATK au thawm pawh a reh hmain Goa tan Ferran Corominas chuan a khung ve leh a, 2-1 in an chak. Zirtawpni zan inkhelah Jamshedpur chuan Piti (penalty) leh CK Vineeth goal hmangin 2-0 in hma hruai mah se Blasters-in Messi Bouli goal hnih hmangin an chhanglet a, 2-2 in an inhnehtawk. 

JFC tan Isaac Vanmalsawma'n inkhel bul a ṭan a, Shillong Lajong tana a khelhpui ṭhin Samuel Lalmuanpuia chu Kerala Blasters tan bench aṭanga luhtir a ni thung. Nizan khan Bengaluru FC leh Mumbai City an inkhel a, result kan hre hman lo. Zaninah ISL inkhel a awm dawn lo a, Nilaini zanah NorthEast United leh Bengaluru FC te an inkhel ang.