Champions League nomawi duhtu Díaz

Bayern Munich forward Luis Diaz chuan Champions League nomawi chawi ngei an duh thu a sawi chhuak a, theihtawp a chhuah tur thu a sawi bawk.

Diaz chuan, "Champions League nomawi chawi thei ngat ila, a nuam ngawt ang. Chumi tithei tur chuan theihtawp kan chhuah bawk.

"Club ropui tak, team ṭha tak leh manager ṭha tak nei kan ni a, chhungkua ang mai kan ni. Tum thuhmun kan nei a, chumi hlawh chhuak tur chuan ṭha takin hna kan thawk ho a ni," a ti a, UCL nomawi chawi a tum.

Mahse, Diaz chuan an tan UCL champion nih a awlsam dawn lo tih a hai lo. Colombian forward chuan, "Nomawi awm zawng zawng chawi vek kan duh. Mahse, tha thlah loa kan beih a ngai dawn.

"Tunlai football-ah chuan eng team pawh hmachhawn an hautak vek em em zel tawh mai a ni. Team ṭha lo bik an awm tawh lo a, champion châka kan tuihal hle a ngai a ni," a ti.

Bayern hian zanin dar 1:30-ah Champions League round of 16 an khel dawn a, Atalanta chu khualmualah an lenchilh dawn - Diaz-a sawi angin eng team pawh an ṭha tawh a, a awlsam dawn lo.

Kum 29 mi Diaz hian Liverpool tana a khelh laiin, 2021-22 season khan Champions League final a lo khel tawh a, mahse, a tlawm zawkah an ṭang - tun nipuiah Bayern a pan a, Liverpool-a a tih theih loh kha tih a duh.

Colombian forward hian German club-ah season duhawm tak hmangin, match 35-ah goal 20 khungin, assist vawi 16 a nei tawh a, a professional career-ah season khata heti zat goal khung a la nei ngai lo.

Hetihlai hian Bayern tan zaninah Harry Kane inlan theih dawn leh dawn loh a la chiang lo. English striker hi an league match hnuhnung berah khan a inlan lo a, coach Vincent Kompany chuan, "Kane a inlan thei lo a nih pawhin kan player neih dang hmangin Atalanta chu kan hmachhawn mai ang," a ti.

German media ṭhenkhat chuan Kane hi UCL atana hahdamtir angin an sawi thung. Kum 32 mi striker hian tun season inelna hrang hrangah match 37 khel tawhin, goal 45 ngawt a khung tawh a, assist vawi nga a nei bawk.