Milan-in Inter an chelh

Serie A hmahruaitu Inter Milan an chelh a, an hmelma AC Milan chuan an inthlauhna tizimin Pathianni zan khan 1-0 in an hneh a, Pervis Estupinan-a'n goal awmchhun a khung.

San Siro-a inkhelh Milan an hlauhawm hmasa zawk a, minute thumna lekah veteran midfielder Luka Modric-a'n goal a khung nghal teuh hle. Inter-in inkhel an thunun chhunzawm a, ball an chang tam zawk.

Minute 34-naah Inter-in chance an nei a, Henrikh Mkhitaryan-a'n thui tak a khalh hnuah keeper chauh a hmachhawn a, Armenian midfielder hian Milan keeper Mike Maignan zawnah tak petin French keeper hian harsatna a nei lo.

Milan-in an vaw let nghal a, minute khat hnu lawkah Estupinan-a'n goal ṭha tak a khung a, Milan hma a hruaipui. Brighton defender hlui Estupinan goal khung theih nan Youssouf Fofana ball pek a ṭha takzet.

Goal an chhuah hnuah Inter an insiamṭha a, ball chang hnem zawk mah se chance hlauhawm an insiam thei meuh lo a, Federico DiMarco, Denzel Dumfries leh Manuel Akanji ten an chance neih an hlah vek a, goal zawnah an pet thei lo.

Milan defender Samuele Ricci-a handball vangin Inter-in penalty beisei mah se, match referee-in a pe lo a, Inter an vanduai a, a tlawm zawkah an ṭang.

Lautaro Martinez tel loin Inter tlarhma an hriam tawk lo a, Pio Esposito leh Ange-Yoan Bonny ten a hmun ruak an hnawh khat zo lo. Argentine forward hi bench-ah ṭhu mah se a la dam chian loh avangin luhtir a ni lo.

Inter coach Cristian Chivu chuan,"Kan khingpuite tlarhnung ṭhiah tumin theihtawp kan chhuah a, kan su tlang thei thlawt lo a ni. Match 10 khelh tur a la awm a, point 30 hlawhchhuah theihin a la awm.

Point sarihin kan la inthlau tho a, chak ta pawh ni ila hmahuaitu kan ni dawn tho a, engmah thil danglam tur a awm lo," a ti a, a naute hnual tur a chhan thiam hle.

Chivu-a'n hlauhthawn tur awm lo angin sawi mah se chak lo thei reng an ni a, an match hmabakah Champions League khelh phak tum Atalanta, Roma leh Como te an la tum dawn a, Coppa Italia-ah Como nen second leg khelh an la hmabak bawk avangin fimkhur takin an khelh a ngai.

Hnehna an chan avangin Milan-in point 60 an hmu a, Inter an hnaih sawt. Massimiliano Allegri naute hian champion beiseina an la chhi êng ve zel a, mahse anmahni hnaih bertu Napoli nen point li chauha an inthlauh avangin an inthlahdah thiang lo.