Chinese GP zawhah rules thlak mai thei

Formula 1 chu February 8, Pathianni khan Australian Grand Prix aṭangin tlan ṭan a ni a, tunkar tawp hian Chinese Grand Prix (March 15, Pathianni) an tlan lehnghal dawn. Khawthlang chanchinbute chuan Chinese Grand Prix zawh hian tun season aṭanga hman ṭan car regulation thar chu an thlak leh dawn niin an tarlang.

F1 hi FIA-in a lo tih ṭhin danin car regualtions thlak thar kum a ni a, tun thlasik khan thil lian tham tak an thlak nual a, 2026-a hman ṭan turin car bakah engine leh a ke thlengin an thlak vek.

Thil thar an duan hi Pathinnia Australian Grand Prix, Albert Park Circuit, Melbourne-a neihah khan hmang ṭan a ni a, George Russell chu pakhatna a ni.

FIA-in thil a thlak danglam hnem avangin zawhna leh sawiselna a tam a, F1 rules thar hi driver ṭhenkhatin an sawisel nasa a, sawiseltu zingah Dutch driver Max Verstappen chu a langsar pawl a ni.

Verstappen chuan engine tharin mamawh a ngah ta lutuk chu a lo sawisel tawh. Dutch driver hi Australian GP neih zawh takah khan parukna a ni.

Lando Norris pawh sawiseltu zingah a tel a, Norris hian an thil thlak danglam avang hian chetsualna lian tak a thlen phah a rin thu a lo sawi tawh a, Pathiannia an intlansiak chu nuam lo a tih ber ṭum niin a sawi bawk.

Lando sawi ang ngeiin Pathianni khan Australian driver Oscar Piastri chu formation lap-ah a chetsual avangin intlansiak pangngaiah a inlan thei lo. Hetihlai hian dan thar ṭha titu zinga mi George Russell chu Australian Grand Prix-ah a chak nghal a, sawiselna tam tak karah rules thar ṭha titu a chak nghal avangin mipui sawi zui a hlawh hle.