Villarreal tan Champions League a hnai

Spanish club hlun Villarreal chuan Pathianni zan khan 2-1 in Elche an hneh a, an dinhmun sawh nghetin palinaah an awm chhunzawm zel a, season thara Champions League khelh an beisei zel.

Villarreal tan Tajon Buchanan leh Santiago Mourino tena goal khat ve ve an khung a, Elche tan Andre Silva goal khung chu scoreline timawitu chauh a ni.

Estadio de la Cerámica, Villarreal-a inkhelah mikhual team in inkhel an thunun zawk a, mualneitu Villarreal an bet zawk.

Ball chang tlem zawk mah se Vilalrreal an hlauhawm zawk a, minute 31-naah Buchanan-a'n amah vengtu mawi taka a bum hnuah chiang takin a pet goal a, Elche keeper Matías Dituro tan dan ngaihna a awm lo.

Minute 10 hnuah Villarreal-in goal an khung leh nghal a, Mourino-a'n goal kilah tak pet lutin an hmahruaina a belhchhah. AN goal hnihna a luh theih nan Villarreal player te ball inpe kual a hmuhnawm hle.

Elche an vanduai reng bik lo a, minute 81-naah Andre Silva'an corner aṭanga a ball hmuh chu a tauh lut a, an siphurh a sut ṭhen. Villarreal defender ten Portuguese forward an veng ṭha tawk lo.

Goal an khung hnuah Elche an phur hman viau a, mahse goal dang khungna hman a awm tawh loh avangin Villarreal-in hnehna an chang.

Yellow Submarine hian point 54 hmuin palinaah an awm a, an chung chiaha awm Atletico Madrid nen an point hmuh zat a inang. An hnuia chiaha awm Real Betis nen point 11-in an inthlau a, an chesual viau a nih loh chuan Villarreal hi season tawpah a sang pali zinga an awm a rinawm ta hle.