Harhchhuah tum Chhinga Veng hmaah Hotshots

Mizoram Super League season 11 boruak a sang zel a, Hawla Indoor Stadium, Republic Vengthlangah basketball ngainatuten hunpui an hmang. Zanin dar 5:30-ah Chhinga Veng BC leh Mission Veng Hotshots te an inhmachhawn dawn a, dar 8:30-ah Chanmari leh Tuikual South BC te an inkhel bawk ang.

Chhinga Veng vs Hotshots

A vawi khat nana MSL kheltu Chhinga Veng BC-in beisei an phak lo a, an match hmasa pahnihah Chanmari BC leh Khatla TBL lakah an tlawm nghal. Mahse Chhinga Veng BC hian an match hnuhnung berah Tuikual South BC an hneh a, point 106 score-in an insiamṭha ṭan.

Chhinga Veng BC coach Lalruatfela (Afela) chuan, "Kan chak loh tawh dan thlirin kan vanduai tih a lang a, player bakah club-in experience kan ngah loh vang pawh a ni thei.

Kan foreigner hi a visa a fel theih loh avangin a la inlan thei dawn lo a, mahse match hmasa lamah hnehna kan chan avangin inrintawkna kan neih belh a, theihtawp kan chhuah ang a, chak ngei kan tum dawn," tiin Vanglaini a hrilh.

Hetihlai hian Mission Veng Hotshots hian Tuikual South BC leh Zemabawk BC te hnehin bul ṭan mah se Inrinni khan Chanmari an hneh lo. Hotshots hi tun season-ah a vawi khat nan an chak lo a, Chanmari laka a chak lohna zat erawh point khat lek a ni - an vanduai.

Hotshots tan ram pawn player Darnell Johnson chu an innghahna a ni leh dawn a, Johnson hian match thum khel tawhin point 40 a la score tling vek. Johnson bakah Lalruatkima a awm dawn bawk a, player of the match-a vawi hnih thlan tawh hi ven bik a sual lo ang.

Chanmari vs Tuikual South

Inkhel hnuhnung zawkah MSL-a sulhnu lo nei tawh Chanmari BC leh Tuikual South BC te an inkhel dawn a, inkhel hmuhnawm a beisei ngam.

Tun season-ah Chanmari an che ṭha a, match thum khel tawhin vawi hnih an chak tawh a, champion lai Zarkawt BCA chiah hneh loh an nei.

Chanmariin an foreign player JP Walker an chhawr thei tawh a, Walker a tlangnel nghal hle a, Mohammad Ishan leh Lokendra Singh te nen Chanmari tan an ṭangkai nghal. Chanmari hian Mizo player langsar an ngah a, champion thei turin theihna sang tak an nei.

An tum tur Tuikual South BC erawh an la khel fuh thei meuh lo a, match thum khel tawhin a chak lo zawkah an la ṭang vek.

Tuikual South BC hi zaninah an chak lo leh a nih ngat chuan semi final khelh phak a harsa tawh dawn a, Chanmari lakah hnehna chan ngei tumin an bei ang.