May 11 aṭangin Pro Volleyball League

Mizoram chhunga volleyball inelna sang ber Pro Volleyball League vawi kuana chu May 11 aṭanga June 13, 2026 chhungin LPS Arena, Falkland-ah buatsaih a ni dawn. Mipa inelnaah team sarih an tel dawn a, hmeichhe inelna lamah team li an tel ang.

March 9, Thawhṭanni khan LPS Vision director Lalsawmliana Pachuau office, Zarkawtah LPS leh Mizoram Volleyball Association-in inremna an siam fel a, mipa inkhel 24 leh hmeichhe inkhel ṭum sarih, a vaiin inkhel vawi 31 a awm dawn a ni. Inkhel zawng zawng hi zan dar 8:00-ah deuh vek ṭan tura ruahman a ni a, LPS Vision-in live-in a pe chhuak vek ang.

Mipa team 7

Mipa team pasarihte hi Anastasia Electric Veng, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers te an ni a, vawi khat ṭheuh an inkhelh kual chhuah hnua a sang paliin semifinal an lut ang. Final hi June 13, Inrinni zana khelh tur a ni.

Nikum khan PVL10 mipa final (May 24, 2025) ah Anastasia-in TNT chu 26-24, 25-10, 21-25, 25-21 (3-1)-a hnehin a vawi hnih nan an champion. Kumin inelnaah nikuma tel team paruk an awm zui leh vek a, hremna avanga season liam taa tel thei lo Chhinga Veng an kir leh bawk. Inelna boruak a nung sawt ang.

Hmeichhe team 4

Hmeichhe team lite hi Tuichangral, Chhinga Veng Spikers, ITI Veng leh Eric Pautu Academy te an ni a, ṭum khat theuh an inkhelh kual chhuah hnua a sang pahnihin final an lut ve thung dawn. Hmeichhe final hi June 12, Zirtawpniah khelh a ni ang.

Nikum khan hmeichhe final (May 23, 2025)-ah Luangmualin Jimmy Club, Kanan chu 25-20, 25-20, 21-25, 25-21 (3-1) a hnehin a vawi thum nan an champion. Kuminah erawh Luangmual leh Jimmy Club te hi an tel dawn lo a, inlan tur team pali zingah champion tawh an la awm loh avangin champion thar an awm dawn.