MPL8 best player Alfred Kemah Jaryan

Aizawl FC captain Alfred Kemah Jaryan chu Mizoram Premier League-a season zawna best player ni thei hmasa ber a ni a, best midfielder-ah thlan tel a ni bawk.

Alfred hian MPL7 khan best midfielder leh best player a dawng tawh a, tun season-a Aizawl FC-in nomawi an chawina kawngah pawh hmun pawimawh a chang. Liberian midfielder Alfred hi MPL8-ah vawi khat chiah khelh loh a nei a, season tir lamah forward-ah awmin goal riat a khung bakah man of the match-ah ṭum hnih thlan a ni. Alfred-a danglamna erawh team khaipa a ni a, mamawhna hmuna a awm zel theih avangin team tan a 

ṭangkai hle.

MPL-a goalkeeper-te lansarh loh ṭum a ni a, match ruk chauh bul ṭan Lalremruata chu best goalkeeper atan an thlang. MPL inkhel hmuhnawm ber zinga sawi theih chu Mizoram Police-in 6-5 a I League club an lehthal ṭum kha a ni a, hetah hian Lalawmpuia thlakin coach rin a hlawh zui a. ITI Veng tlangval Arema hian vawi li clean sheet a nei hman tho a, I League lamah pawh man of the match atan thlan a ni tawh bawk.

Aizawl FC champion-na kawngah Alfred ang thoa ṭangkai chu Richard Kassaga a ni a, defender tharum ngah tak hian goal venhim chauh duh tawk loin goal nawr kawngah pawh a ṭangkai ṭhin hle. Kassaga hi man of the match-ah vawi khat chauh thlan ni mah se AFC-in MPL8 match 17-a clean sheet vawi 12 an neihna chhan bulpui a ni.

Best forward lak phu tak tak karah Isak Vanlalruatfela a rawn lang hlawl a, Thingsulthliah tlangval hian season tluana a khel ṭhat bakah semifinal leh final-a goal pawimawh avangin chawimawina hi a phu. Isak hian goal ruk a khung a, man of the match-ah vawi hnih thlan a ni.