Pencak Silat-ah gold la

Martial art chi khat, Pencak Silat-ah Mizo nula Monica Zodinpuii chuan gold medal a hlawh chhuak - Dawrpui Vengthar nula hi Pencak Silat East Zone Championship-ah Mizoram aiawha inlanin, gold hi a la a ni.

Monica-i hi 52kg category-a inlan tur ni mah se, harsatna avangin 100kg-a inlan a huam leh huam loh zawh a ni a, a inhuam thu a sawi hnuah inlanin, gold a la ta tho!

Jharsuguda, Odisha-a neih inelnaah hian Durtlang Kawn Veng nula Vanlalṭanpuii (100kg) chu bronze medal a hlawh chhuak bawk a, Mizo hming an timawi hle - Mizo nulate hi coach PMS Dawngliana kaihhruaina hnuaiah an inlan.

Inelnaah hian state 11 aṭangin Pencak Silat player an fuankhawm a, Jharkhand, Bihar, Tripura, Nagaland, Manipur, Meghalya, Sikkim, West Bengal, Assam, Odisha leh Mizoram aṭangtein an kal - Mizoram tan infiamna hi thil thar deuh la niin, infiammi pahnih chiah an kal a, medal an lo hawn ve ve.