West Ham-in Brentford pet chhuak

FA Cup fifth round aṭangin West Ham chuan Brentford an pet chhuak a, an hneh dan erawh penalty a ni - team pahnih hi 2-2 in an inhnehtawk a, extra time khelh hnuah pawh chak zawk an awm loh avangin penalty hmanga zawn a ni.

Penalty pet a nih hnuah 5-3 in West Ham an chak a, kum 10 hnua a vawi khat nan FA Cup quarterfinal an lut ve leh ta - an hlim khawp ang.

West Ham tan captain Jarrod Bowen chuan minute 19-naah goal hmahruai a khung a, mahse, Brentford tan Igor Thiago chuan si phurh hi a sut.

Hammers hian minute 34-naah penalty hmu zuiin, Bowen bawkin a khung a, a suttu pawh Thiago bawk niin, penalty aṭang bawkin a sut - Thiago-a'n si phurh a sut zawh hian minute 81 a ni tawh a, goal dang a luh zui loh avangin extra time an khel.

Mahse, extra time-ah pawh goal a lut tawh chuang lo - penalty hmangin chak zawk zawn a ni a, Hammers tana pettuten an chhuih luh vek laiin, Brentford tan Dango Ouattara chuan 'panenka' hmangin a pet kher kher a, a pet goal loh phah!

Brentford an tlawm a, West Ham an chak - Premier League table-a 18-na ni mek Hammers tan result lawmawm bik a ni a, Inrinni zan dar 1:30-a league match khel tura Manchester City an mikhual hunah an phur sawt ang.