Zanin MSL a hmuhnawm dawn

Mizoram Super League a 'hot' zel a, boruak tihsan belh turin zaninah match hmuhnawm a awm dawn. Dar 5:30-ah Zemabawk BC leh Saron BC te an inhmachhawn dawn a, club pahnihte hi semifinal beisei ve ve an nih avangin inkhel hmuhnawm a beisei ngam.

Dar 8:30-ah MSL-a sulhnu nei ṭha pahnih Khatla TBL leh Zarkawt BCA te an intawng dawn a, champion tum ve ve an nih avangin boruak a sang dawn.

Zemabawk nge Saron

Season hmasaah Zemabawk BC-in beisei phak baka an khelh ṭhat avangin MSL 11-ah ṭantu an ngah nghal. Mahse Zemabawk BC ten beisei an pha lo a, match thum khel tawhin an la tlawm fai vek.

Zemabawk BC coach Liansangpuia chuan,"Kan foreigner Carl hi food poisoning avangin ngai a la awh thei lo a, dam chiang lo chunga kan chhawr a ngaih avangin BCA lakah chiah khan a khel ṭha.

Mahse Saron lakah kan inter state player pakhat zawk Pratyanshu Tomar a khel thei tawh dawn a, player dang an khelh theih vek dawn avangin chak kan inbeisei," tiin Vanglaini a hrilh a, hnehna chan ngei an tum tawh hle.

Saron BC erawh an ṭhat dan berin an khel thei tawh a, match thum khel tawhin vawi khat chiah an chak lo a, an hneh loh hi champion lai Zarkawt BCA an ni.

Saron hian Inter state player pahnih bakah Hugo S Chotter an nei a, Mizo player langsar T. Lalhriatzela leh MSL X rookie of the league Lalmalsawma an kawl bawk avangin Zemabawk a lakah an zam dawn lo.

TBL vs BCA

Match hmasa berah Saron hneh lo mah se TBL an insiamṭha tawh a, TBL hian Saron hnuah Chhinga Veng BC leh Zemabawk BC te hmachhawnin an chak ve ve. Zemabawk BC lakah hian 2nd quarter-ah point 30 laiin hma an hruai hman.

TBL hian Inter state player pahnih Amjoy Singh Gill leh Palpreet Singh Brar te an nei a, ram pawn player Makhel Ahkim Mitchell te nei bawkin an tlangnel nghal a, anni bakah hian Vanlalṭhazuala leh Emmanuel Vanlalawmpuia te an neih bawk avangin BCA hneh turin an ṭha tawk.

Hetihlai hian BCA in hnehtu an la tawng lo a, champion nawn an tum hle. BCA hi an thiampuipa Lalrina Renthlei khel lo mah se buaina an tawk lo. Zonunsanga leh Lalnunpuia Renthlei ten innghahna tlak an nihzia an tilang tawh a, Matthew Remtluanga Sailo a awm bawk a, Mizo hlang pawhin an ṭha hle.

Ram pawn aṭangin Caio Domingos Oliveira leh Nawaz Singh Panaich te an nei a, MSL-ah an ram pawn player te an tlangnel nghal a, an chak tluan theih nan an thawh hlawk thei hle.

BCA coach K. Vanlalruata chuan,"Kan player te an dam kim a, kan khelh ṭhat tluan lai a nih avangin kan chak ngei ka beisei," tiin Vanglaini a hrilh a, TBL an huphurh lo.