Team huaisen Bodo/Glimt hmaah Sporting

UEFA Champions League khelh meka mipui barakhaihtu Bodo/Glimt an inlan leh tawh dawn a, Norweigian club hian zanin dar 1:30-ah Sporting Lisbon an mikhual dawn.

Tun season Champions League khelh ṭan a nih khan, mi tam zawk chuan Bodo/Glimt an hre kher lo ang. An club chanchina a vawi khat nana UCL khel an ni a, player langsar an kawl loh bawk avangin hriat loh pawh a awm viau. Mahse tunah erawh football ngaina tute titi ber an ni mek.

UCL league round tir lamah pawh mi hriat an la hlawh chuang lo a, match ruk an khelhah an khingpuite vawi thum an inhnehtawkpui a, vawi thum tlawmin match hnih khelh tur la awmah an tlak a rinawm tawh zawk.

Mahse league round match tawp pahnih an khelh hi mi nawlpui hriat an hlawh ṭanna a ni. January 20 khan Manchester City an mikhual a, chak zawk tura rinkai ni lo chungin 3-1 in City an hneh a, playoff khelh phak beiseiin an phur thar. Mahse City an mikhual ṭum hian Rodri-a'n red card a hmuh avangin Bodo/Glimt an vanneiah a la ngaih theih.

League round match hnuhnung berah Atletico Madrid 2-1 in khualmualah an hneh leh a, point kua hmuin table-ah 23-naah an awm a, goal difference hmangin playoff khel turin an tling.

Last 16 playoff-ah Inter Milan nen pawh fuh an ni a, Bodo zinkawng a tawp tawh tura ngaitu an tam hle. Mahse Bodo/Glimt an huaisen a, an mulah 3-1 in Inter an hneh a, second leg-ah San Siro luhchhuahin 2-1 in an chak leh a, aggregate-ah 5-2 a chakin last 16 an lut a, zuam ngawt chi an ni tawh dawn lo.

Bodo/Glimt tan Kasper Hogh chu an innghahna a ni leh dawn a, Danish forward hian UCL-ah goal li a khung tawh a, assist vawi thum nei tawhin a team chetṭhat nan a ṭangkai hle.

Hogh bakah Jens Petter Hauge a awm dawn bawk a, AC Milan tan pawha lo khel tawh hian club lian zawk laka thilmak thlentir turin theihna sang tak a nei a ni.

Hetihlai hian Sporting an duai bik lo a, Portuguese club hi league round-a champion lai Paris Saint Germain hneh theitu an nih avangin dah hniam chi an ni lo.

Sporting tan Luis Suarez chu an hmachhuan a ni leh dawn a, Colombian forward Suarez hian tun season UCL-ah goal li a khung tawh a, tlarhma lamah an innghahna ber a ni. Suarez hi Liverpool leh Barcelona-a khel ṭhin Luis Suarez kha a ni lo.

Suarez bakah a kawppui turin Trincao a awm dawn bawk a, Barcelona forward hlui Trincao hian goal li tho khung tawhin Suarez nen Bodo/Glimt lakah goal khung ngei an tum leh dawn.