Endurance race-ah Verstappen tel dawn

F1 racer Max Verstappen chuan Nurburgring-ah darkar 24 chhung intlansiaknaah a tel dawn tih a tichiang, May thlaah endurance race-ah hian a tel dawn.

Nurburgring hi Germany-a car intlansiakna hmun pakhat a ni a, kum 1976 hnuah F1-in intlansiak nan an hmang leh tawh lo. He hmunah hian endurance race neih tura ruahman a ni a, darkar 24 chhung chawl lova intlansiak tur niin, driver erawh an inthlak thei thung dawn.

Dutch driver Verstappen chuan, "Nurburgring hi hmun danglam tak a ni a, darkar 24 chhung inelnaah hian ka tel chakna a rei tawh a, ka tel ve thei tur hi mak ka tiin ka lawm em em a ni. He inelna hi a hlu a, kan intlansiakna aṭangin zirtur tam tak pawh a awm ka ring," a ti.

Verstappen hi tun kara neih tur Chinese Grand Prix atan a inbuatsaih mek a, Chinese GP zawhah hian March 29, Pathianniah Japanese Grand Prix hmachhawn turin a inbuatsaih leh nghal dawn.

Red Bull driver Verstappen hian Pathiannia neih zawh tak, Australian Grand Prix-ah khan bul a ṭan ṭha lo a, 20-na aṭangin parukna a ni leh tho. Verstappen hian inelna a hmachhawn leh turah hian chak ngei a duh tawh dawn a, a team-te nen ngawrh takin an inbuatsaih mek.