Europe-a inlan tum Espanyol chak zo lo

Spanish club hlun Espanyol chu Thawhṭanni zan khan La Liga table mawng bera awm Real Oviedo nen 1-1 in an inhnehtawk a, an chung chiaha awm Celta Vigo hnaih theihna hun ṭha an bawhpelh.

RCDE Stadium-a inkhelah mikhual team Real Oviedo-in goal an khung hmasa zawk a, minute riatna lekah Alberto Reina-a'n chiang takin a pet goal a, Los Godos (Oviedo kohna dang) hma a hruaipui.

Mualneituin minute 36-naah an chhanglet a, Kike Garcia-a'n pet goal-in an siphurh a sut a, Spanish striker hian goal kilah tak pet lutin a khung mawi hle.

Goal an khung hnuah Espanyol-in na takin an nawr a, chance hlauhawm tam tak insiam mah se an chhawr ṭangkai thei lo a, hun tawp thlengin goal dang a lut tawh lo a, team pahnihten point khat an insem.

Espanyol hi tun season-ah an che ṭha a, table-ah pasarihnaah awm mekin season tharah Europe inelnaa tel an inbeisei. Espanyol hian a parukna Celta Vigo chu point thumin an pha lo mek a, season tharah Europe-a inlan an duh chuan an chesual thiang tawh lo.