Chelh rual loh Liverpool an kal zel

Premier League-ah Liverpool ngam thei an la awm lo. Inrinni zan khan Reds hian an mikhual Watford chu 2-0 in an hneh a, match 17 an khelh tawhah la tlawm loin table chung ber an luah chhunzawm zel. 

Jurgen Klopp leh James Milner ten contract thar an ziah zanah a lawm nan Mohamed Salah chuan goal hnih a khung a, Anfield-ah Watford-in a chhanletna tur an nei lo. Liverpool chak laiin anmahnih hnaih bertu Leicester City an chak zo lo a, an mikhual Norwich City nen 1-1 a an inhnehtawk avangin Reds an thlauhna chu point 10 lai a ni ta. 

Foxes hian league-ah Manchester City leh Liverpool an hmachhawn zui dawn avangin a harsa dawn tih a chiang a, Reds fan-ten kum 30 chhung an lo nghah tawh Premier League nomawi an hnaih zel. 

Anfield-a inkhelah a ṭantir aṭangin Liverpool-in inkhel an thunun nghal a, Salah leh Roberto Firmino ten hma taka goal khungna remchang an neih chu an chhawr thei lo thung. Coach thar Nigel Pearson enkawlna hnuaia khel Watford-in goal venhim a finthlak tih an hria a, tlarhnung lamah player an tam hle. Mahse, minute 38-naah Firmino, Sadio Mane leh Salah te ball inpe kual erawh an dang thei lo a, a tawpah Salah chuan a chhawr. 

Will Hughes leh Etienne Capoue ten Watford chance neih an chhawr theih loh hnuah Ismaila Sarr chuan uiawm takin hun ṭha a hlah ve leh a, goalkeeper Alisson chuan vawi hnih ngawt save ṭha zet a nei bawk - Mane goal khung chu VAR rawn a nih hnuah pawm a ni bik lo. 

Virgil van Dijk, Alisson leh Trent Alexander-Arnold inringthul karah Reds hian own goal an nei teuh viau bawk a, fans thin phu rang beng dai turin Salah chuan minute 90-naah chak nemnghehna goal a khung. 

Liverpool boss Jurgen Klopp-a'n Watford nen an inkhelh hmain Anfield-a cham chhunzawm zel turin contract thar a ziak a, kum 2024 thleng a cham dawn. German coach hian October 2015 khan Liverpool hi a pan a, Merseyside club a zawm hnuah tun hi contract thar a ziah vawi hnihna a ni - kum khatah pound maktaduai 15 a hlawh dawn niin khawthlang media-te chuan an tarlang.

"Dinhmun duhawm takah kan awm a, he club hi chhuahsan thei ka ni lo," tia Klopp-a'n a sawi zanah an dinhmun duhawmna chu belhchhahin a awm a, Watford lakah zahngaihna an lantir lo. Klopp rual hian midfielder pawimawh James Milner chuan contract thar a ziak ve bawk a, kum 33 mi midfielder hi kum 2022 thleng Liverpool-ah a cham dawn. 

Hmabak chu 

Liverpool hian Thawhlehni zanah League Cup quarterfinal an khel nghal dawn a, Aston Villa an hmachhawn ang - Nilaini zan dar 11:00-ah match an nei lehnghal ang a, Club World Cup semifinal-ah Monterrey an hmachhawn dawn. 

Mexican club Monterrey hian CWC quarterfinal-ah Inrinni zan khan Xavi enkawl Al Sadd chu 3-2 in an hneh a, inkhel dangah Al Hilal chuan 1-0 in Es Tunis an hneh bawk. 

Reds hian nimin zing khan senior squad-a player 23 nen CWC semifinal khel turin Qatar an pan nghal a, Thawhlehni zanah Under 23 coach Neil Critchley hoin rawlthar rualin Aston Villa an lo 

CWC khelh zawhah December 27 khian Leicester an lenchilh dawn a, Foxes hian Inrinni zan khan Norwich chu 1-1 in an inhnehtawkpui - Teemu Pukki chuan goal hmahruai a khung a, Foxes tan Jamie Vardy-a ball tauh chu Norwich keeper Tim Krul chuan an lamah a ti lut.