NBA All-Star Weekend 2020 Kobe sunna, Slam Dunk, Player thiam bikte

NBA All-Star Weekend chu tukin zing aṭangin Chicago-ah ṭan a ni dawn a, ni thum awh tur basketball hunpui hian khawvel hmun hrang hrang aṭangin ngaihven a hlawh hle.

All-Star Weekend-ah hian basketball legend Kobe Bryant sunna hun neih a ni dawn a, Los Angeles Lakers star Bryant hi January 26, Pathianni khan helicopter chesualna avangin a fanu Gianna (Gigi) leh midang pasarih telin an thi.

All Star Game hi February 17, Thawhṭanni zing dar 6:30-ah khelh a ni dawn. Team LeBron chuan Gianna number hak ṭhin jersey number 2 an ha ang a, Team Giannis-in Bryant number hak ṭhin jersey number 24 an ha thung ang. Jersey-ah hian mitthi pakua hriatreng nan star pakua a chuang bawk.

Inelna kalphung pawh thlak hret a ni dawn. Basketball hi quarter li a ni a, quarter khat hi minute 12 zel a ni. Tun ṭum All Star Game-ah erawh fourth quarter ṭan hma chiahin 'game clock' an titawp ang. 

Team pahniha point hmu sang lamah Kobe-a number 24 an belh ang a, chu chu 'target score' a ni ang. Fourth quarter-ah hun bithliah a awm tawh lo ang a, 'target score' hmu hmasa zawk an chak ang. Hei chauh hi a ni lo a, quarter tawp berah hian fakna a awm dawn lo.

Team LeBron bul ṭan panga te chu LeBron James, Anthony Davis, Kawhi Leonard, Luka Doncic leh James Harden te an ni a, Team Giannis bul ṭan turte chu Giannis Antetokounmpo, Joel Embiid, Pascal Siakam, Kemba Walker leh Trae Young te an ni thung. Nikum khan Team LeBron chuan Team Giannis chu 178-164 in an hneh.

February 16, Pathianni zing hi mimal thiamna lantir hun a ni dawn a; Skills Challenge, 3-Points Contest leh Slam Dunk te hian en a hlawh ṭhin. Slam Dunk-ah kum 12 liam taa 'Superman style dunk' hmanga pakhatna ni tawh LA Lakers star Dwight Howard a rawn kir dawn a; Aaron Gordon (Orlando), Derrick Jones Jr. (Miami) leh Pat Connaughton (Milwaukee) te an inel dawn.

3 Points-ah pakhatna ni lai Joe Harris (Brooklyn) chu Davis Bertans (Washington), Devin Booker (Phoenix), Devonte' Graham (Charlotte), Buddy Hield (Sacramento), Zach LaVine (Chicago), Duncan Robinson (Miami) leh Trae Young (Atlanta) te an inel ang. 

Skills Challege-ah Detroit star Derrick Rose chu a inhliam avangin Oklahoma City Thunder guard Shai Gilgeous-Alexander in a thlak ang a; Bam Adebayo (Miami), Patrick Beverley (LA), Spencer Dinwiddie (Brooklyn), Shai Gilgeous-Alexander (Oklahoma City), Khris Middleton (Milwaukee), Domantas Sabonis (Indiana), Pascal Siakam (Toronto) leh Jayson Tatum (Boston) te nen an inel ve bawk ang.