Spurs mangchhia a tawp thei lo!

Tottenham Hotspur mangchhia a tawp thei lo - Premier League aṭanga relegate thei dinhmuna ding mek club hi Champions League aṭang pawhin an tlak a rinawm ta.

Spurs hian Thawhlehni zan khan Atletico Madrid chu khualmualah an lenchilh a, 5-2 ngawtin an tlawm! Atletico hian minute 22 chhungin goal li an khung a, London club an talbuai takzet.

Tottenham coach lailawk Igor Tudor-a'n thil thlak danglam tumin, first choice keeper Guglielmo Vicario chu bench-ah a dah a, Carabao Cup-ah vawi hnih bul a ṭan tawh tih bak Spurs tana bul la ṭan ngai lo, keeper Antonin Kinsky chu bul a ṭantir mauh.

Tudor-a'n game boruak sangah player naupang hmangin a team her danglam a tum a, a tisual chiang hle. Minute rukna lekah Marcos Llorente chuan goal hmahruai a khung a, Kinsky ball petchhuah tum chu tawlhthluin, heta ṭang hian goal hi a lut.

Hetah mai hian a la tawp lo. Minute 14-naah Antoine Grizemann chuan an goal hnihna a khung a, hei pawh Spurs defender Micky van de Ven tawlhthluk vanga lut a ni.

Atletico ṭantute hlim au thawm pawh a reh hman lo. Minute 15-naah Spurs keeper Kinsky a chesual leh a, ball petchhuah a tum chu pet sualin, Alvarez chuan duhthalin goal ruakah a khung.

Kum 22 mi Kinsky a inringtawk tawh lo tih a chiang a, Tudor-a'n minute 17-naah a la chhuak. Czech keeper hi coach berin lo hnem lo mah se, a ṭhianten an hnem a, Atletico fan-ten kut bengin an thlah bawk.

Kinsky lakchhuahin awmzia a nei thui lo. Robin Le Normand-a'n Atletico goal lina a khung belhchhah a, 4-0 a nih hnuah Spurs tan Pedro Porro chuan si phurh a sut ṭhen bawk.

Mahse, London club goal chhuah a tam lutuk hret a, comeback a harsa tawh - minute 55-naah Alvarez-a'n a khung belh a, 5-1 a ni! Atletico keeper Jan Oblak chesual zuiin, Dominic Solanke tan goal 'khilai' mah se, scorline cheimawina bak a tling lo.

Spurs-in Thomas Frank bana an lakluh Igor Tudor hoin match li an khel tawh a, an la tlawm vek! Croatian coach hi an ring lui zel a nih chuan an relegate lo ang tih a sawi theih loh.