Barca lakah Magpies an vanduai

Newcastle United-in rin loh takin Barcelona chelh mah se, Eddie Howe-a naute hun pek belha Lamine Yamal penalty vangin an chak zo lo a, St James' Park-a inkhelah 1-1 a lungawi an zir.

Spanish champion Barca-in Newcastle khelmualah hnehna chan an beisei a, an beisei ang erawhin an khel bik lo - Magpies-in khelmual chhungah chuan an inang tlang vek tih pawmin, Barca hi an zah bik lo.

Hun tawp nan minute li chiah a awm tawh tihah Magpies hian goal an khung a, Harvey Barnes chu goal khungtu a ni - goal luh hun ngaihtuahin Magpies hi an chak mai a rinawm tawh zawk.

Mahse, hun pek belhah Barca an vannei a, bench aṭanga luhtir Dani Olmo chu Malick Thiaw chuan lo titluin, penalty a chawi a, a pet turin Lamine Yamal a lo pen chhuak.

Spanish forward hian harsatna nei loin goal-ah a chantir a, 1-1 a ni. Hun pek belh a nih tawh avangin goal dang luhna hun a awm tawh lo a, 1-1 a inkhel tawpin Barca an vannei haw.

Player ngaihven hlawh Yamal-a'n goal khung mah se, penalty a ni a, minute 90 chhung Magpies fullback Lewis Hall-a'n a dah ṭha thei - Nou Camp-ah hei aia result ṭha zawk an beisei dawn.

Coach pahnihin substitution an siam ve ve - an tifuh ve ve! Eddie Howe-a'n minute 67-naah Tino Livrameneto, Jacob Murphy leh Anthony Gordon te a rualin a luhtir a, a tisual lo.

Damlohna avanga bul ṭan lo Gordon hian Murphy tan ball pein, Murphy hian Barnes a siamsak ve leh a, an hmahruaina goal an khung phah - English winger Barnes hi Magpies fan-te chuan lakchhuah a nihin kut bengin an lawm hial.

Kum 1997 khan Newcastle hian 3-2 in Barcelona hi an lo hneh tawh a, kha inkhelah khan Catalan club tan Luis Enrique leh Luis Figo ten goal khung mah se, Magpies tan Tino Asprilla chuan hattrick a siam.

Thawhlehni zana inkhel pawh hi Asprilla hian a hmunah enin, an chak mai a beisei ve hman tho ang. Mahse, Flick-a'n Howe ang thoin substitution a siam fuh a, bench aṭanga luhtir Olmo-a'n penalty a hlawh chhuak.

Yamal-a'n goal-ah a chantir a, draw result nen an haw. Team pahnih hian Nou Camp-ah second leg an la khel leh dawn a, ngaihven a hlawh dawn.

Premier League-a beisei phak lo Newcastle-in Barca an ngam thei a nih chuan, coach Eddie Howe-a'n, "Tun hnaia Magpies game pawimawh ber a ni," ti hiala Catalan club nena an inkhel tur a lo sawi lawk tawh avangin, English coach leh a team ten fak an hlawh ang.