Semifinal beiseitu Hotshots leh Chanmari

Mission Veng Hotshots leh Chanmari BC te beisei phak bakin an khel ṭha a, Mizoram Super League season 11-ah semifinal khelh an beisei. Hotshots hian Thawhlehni khan 87-77 in Chhinga Veng an hneh a, Chanmari BC-in 74-69 in Tuikual South BC an hneh bawk.

Hotshots an puak ring

Tun season-ah Hotshots hi kai thar an ni a, kai thar an nih avangin an inthlahrung lo a, match li khel tawhin vawi thum an chak tawh a, semifinal luh an inbeisei.

Dan pangngaiin Hotshots tan Darnell Johnson a che ṭha lehpek a, point 30 neiin rebound vawi 18 a la, Lalruatkima'n point 20 neiin rebound vawi 12 a la a, player of the match-ah thlan a ni. Ruatkima hi player of the match-ah vawi thum thlan a ni tawh.

Chhinga Veng Bc inter state player Sahej Kumar Patel (16), Samar Pratap (12), Lalhriatzuala (13) leh Vanlalhmangaihsanga (11) te khel chhe lo mah se Hotshots hneh nan a tawk lo.

Chanmari vs TKS

Inkhel hnuhnung zawkah Chanmari BC an vannei a, Chanmari tan Lalrozama khel lo mah se buaina an tawk lo a, a unaupa Lalnunsanga'n point 23 neiin rebound vawi 10 a la a, player of the match-ah thlan a ni a, Chanmari tan a langsar ber.

Nuna bakah ram pawn player Mohammad Ishan leh JP Walker te an ṭangkai a, point score tam lo mah se Chanmari chak nan an thawh hlawk hle.

Chanmari hian match li khel tawhin vawi thum an chak tawh a, Vanlalnunsanga (Lana) hoa khel Chanmari hian hnehna an chang zel a nih chuan, semifinal mai bakah champion an sawi ri ngam tawh ang.

Tuikual South BC an insiamrem thei meuh lo a, foreigner Quentin Davis a khel thei tawh a, Davis hian point 31 score-in rebound vawi 13 a la a, MSL-ah a tlangnel nghal hle.

Lalbiakkima'n point 19 a nei bawk mah se an vanduai a, point nga chauhin an chak lo. Tuikual South hian match li khel tawhin an tlawm vek a, MSL-a inhamtan zel an tum a nih chuan harhchhuah a hun.