Lakers chakna Doncic-a triple double

Los Angeles Lakers chuan nimin zing khan 120-106 in Minnesotta Timberwolves an hneh a, Lakers tan Luka Doncic-a'n triple double siamin a langsar hle.

Crypto.com Arena, Los Angeles-a inkhelah Lakers tan veteran player Lebron James a la inlan lo a, LeBron tel lo mah se Doncic a awm avangin harsatna an tawk lo. Slovenian point guard hian point 31 a score a, assist 11 neiin rebound vawi 11 a la a, triple double a siam.

Doncic bakah Austin Reaves (31), Deandre Ayton (14) leh Luke Kennard (10) te an khel ṭha a, Lakers chak nan an thawhhlawk hle.

Wolves tan player paruk ngawtin point 10 an score tling a, Anthony Edwards, Julius Randle, Naz Reid leh Ayo Dosunmu te khel ṭha viau mah se an vanduai ṭum an tawng a, an chak zo lo.

Veteran forward LeBron James-a'n a zawnin match thum a khelh lohna ni tawh a, March 5, Ningania Denver Nuggets an inkhelh ṭumin a kiu a sawh a, a rawn kir hun tur sawi theih a la ni lo a, inenkawl a la mamawh niin Lakers coach JJ Redick-a'n a sawi.

Lakers hi Western Conference-ah palinaah an awm a, February thlaah inthlahdah deuh mah se an insiamṭha leh tawh a, playoff khel turin an dinhmun a ṭha tawh hle.