Aston Villa-in Lille lenchilh dawn

Zanin aṭangin Europa League last 16 khelh a ni leh dawn a, dar 11:15-ah Aston Villa-in Lille an lenchilh dawn a, Villa hian tlang an tum a nih chuan khualmuala an result a pawimawh dawn.

Tun season-ah Villa an che ṭha a, Premier League-ah pawh a che ṭha pawl niin season thara Champions League khelh an inbeisei. Mahse Villa hi tun hnaiah an inthlahdah a, Michael Carrick-a hnuaia harhtharna chang Manchester United-in an lehpel tawh.

Unai Emery hote hi an match hnuhnung pangaah vawi khat chiah an chak a, Lille lakah an record duhawm lo hi thai bo an tum dawn. Villa tan Youri Tielemans, Boubacar Kamara leh Andres Garcia te chu inhliam vanga khel lo tur chiang sa an ni a; John McGinn, Matty Cash leh Harvey Elliot te dinhmun a chiang lo bawk.

Tlarhma lamah tun season-a che ṭha tak Morgan Rogers a awm dawn a, Rogers rualin Ollie Watkins leh Tammy Abraham ten Lille an hmachhawn a rinawm. Villa tan Leon Bailey leh Emiliano Buendia te an khel thei tawh dawn a, inringtawk takin French club an lenchilh ang.

Aston Villa hian March 15, Pathianni hian Old Trafford-ah Manchester United an hmachhawn leh nghal dawn a, pathumna United nen an point hmuh zat inang mah se goal difference-ah an pha lo a, lehpelh ngei tuma an khelh dawn avangin Unai Emery-a'n player ṭhenkhat a chawlhtir a rinawm.

Hetihlai hian Lille tan tlarhma lamah Olivier Giroud a awm leh dawn a, Arsenal leh Chelsea forward hlui hian tun season Europa League-ah goal li a khung tawh a, a kum tam ve deuh tawh mah se Lille innghahna a la ni.

Giroud thlawp turin Hamza Igmane a awm dawn bawk a, Igmane hian goal li bawk a khung tawh a, Villa laka danglamna thlen turin theihna sang tak a nei a ni.