Walker-a'n ram tan inkhelh a chawlhsan

Burnley defender Kyle Walker chuan Thawhlehni khan ram tan inkhelh a chawlhsan thu a puang a, England tan vawi 96 inlan hmanin kumin World Cup-ah a khel dawn ta lo.

Kum 35 mi Walker chuan,"England tana ka thiltih te avangin ka inchhuang em em a, mahse vawiin hi a tawp ni tur a ni. He thutlukna ka siam a ngai hi pawi ka ti a, ram tana ka career tihtawp mai hi a ṭha zawk," tiin, ram tan inlan a tum tawh lo.

Walker hian Sheffield United-ah a career ṭanin, Tottenham Hotspur leh Manchester City-ah te a kal leh a, tunah Burnley tan a khel mek. Nikum January khan City tan a khelh laiin loan hmangin AC Milan tan a khelhsak hman bawk.

Kum 2011 khan ram tan a vawi khat nan Spain nen an inkhelh ṭumin a inlan a, England tan inelna panga - Euro 2016, 2020 leh 2024, World Cup 2018 leh 2022-ah te a inlan a, England coach hlui Gareth Southgate-a hnuaiah player pawimawh niin, Euro 2020 leh 2024-a final an thlen theih nan a ṭangkai hle.

Man City defender hlui Walker hi UEFA team of the tournament-ah thlan a ni tawh a, 2023 khan ram tan captain armband a lo hreng tawh bawk. Tun hnaiah Walker hian Thomas Tuchel-a duhsak a hlawh tawk lo a, England tan Walker a inlan hnuhnun ber chu nikum June kha a ni a, hemi hnu hian a inlan leh tawh lo a, khelh phak tuma beih ai chuan chawlh a thlang ta zawk.