Indian Football League round 2-ah Mizo 40 inlan

India rama football inelna sang ber dawttu Indian Football League-ah Mizo an ṭhahnem a, kar liam taa round 2 khelh zawh takah khan khelmuala inlan Mizo 40 an awm. Mizo player 25-in bul an ṭan a, bench aṭanga lut 15 an awm bawk.

Round 2 bika khelmuala player inlan zat hi 157 an ni a, Mizo inlan percentage hi 25.48% a ni pha daih. IFL-ah Mizo club pahnih Aizawl FC leh Chanmari FC an awm a, hmun lia ṭhena hmun khat Mizo an ni pha.

Starting XI chang pha 110 zingah Mizo 25 an awm a, inkhel bul ṭan zinga 22.73% chu Mizo an ni pha. Heng zawng zawng hi Mizo club pahnih Aizawl FC leh Chanmari FC te inpekna rah a ni a, Mizo club pahnih enkawltuten fak an phu hle.

AFC-ah 16

Aizawl FC-in round 2-a Rajasthan United an hneh ṭumin Mizo player 16 an chhawr. Coach R. Lalruatfela'n Mizo player 11 bul a ṭantir a, substitute aṭangin Mizo panga a luhtir bawk. Bul ṭantute hi goalkeeper Vanlalhriatpuia, defence-ah Laldawngzuala, Rohmingthanga, T. Lalmuanawma leh H. Lalrempuia te an awm bawk.

Midfield-ah Lalawmpuia, Vanlalawmpuia leh Lalawmpuia Sailo te an awm a, tlarhmaah Vincent Lalduhawma, Zomuansanga leh Laltlanzova te an awm. Bench aṭangin Laldanmawia, Malsawmzuala Tlangte, Lalhriatpuia, Stephen Lalrinfela leh Eric Remruatpuia Chhangte te an lut bawk.

CFC-ah 14

Chanmari FC-in Sreenidi Deccan an hneh ṭumin Mizo player 14 an chhawr. MPL champion lai hian bul ṭantuah Mizo 10 an hmang a, bul ṭantu zingah Brazilian forward Jota a tel. Goalkeeper-ah Zothanmawia a tel a, defence-ah F. Malsawmtluanga, Lalhmangaihsanga, Malsawmsanga Renthlei leh K. Lalruatdika te an awm.

Midfield-ah Joel Lalramengmawia, C. Lalmuanpuia leh Michael Lalbiaksanga te an inkawp a, tlarhmaah Michael Lalbiaksanga, KC Malsawmsanga leh Suanngaihmuana te an awm bawk. Bench aṭangin Aron Vanlalrinchhana, Lalruatsanga, Lalpekhlua leh Crespo Vanlahriatpuia te an lut a, Manipuri midfielder Christopher Kamei a inlan ve bawk.

Mizo dang

Sreenidi Deccan-ah Lalthankhuma leh Lalromawia ten bul an ṭan a, bench aṭangin Brandon VL Remdika leh Lalbiakliana te an lut ve bawk. Diamond Harbour bul ṭantu zingah Mizo tel o mah se bench aṭangin Lalliansanga Renthlei leh Paul Ramfangzauva te an lut.

Rajasthan United-ah Lalfelkima'n bul a ṭan a, bench aṭangin Joseph Lalvenhima a lut. Shillong Lajong leh Namdhari-ah Mizo bul ṭan an awm a, Shillong club tan Jakob Vanlalhimpuia chu bench aṭangin a lut a, Punjab club tan Emmanuel Lalchhanchhuaha bench aṭangin a lut ve bawk.