Adam Wharton a 'luck'

Crystal Palace midfielder Adam Wharton chuan duhtu a ngah a, amah duhtu club an hrawl hlawm hle a, Wharton hi nipui transfer bazar tinghahhlehawm tu pakhat a ni.

English midfielder Wharton hi season hmasa aṭang tawhin a khel ṭha a, tun season-ah Crystal Palace midfield innghahna ber a ni der tawh. Wharton duhtu zingah Manchester United an langsar ber a, United hian Wharton hi an hel reng tawh.

United bakah club dang an lo lang a, an zingah Premier League club tho Liverpool leh Manchester City bakah Real Madrid te chu a langsar pawl an ni.

Kum 22 mi Wharton hian Palace-ah 2029 thleng contract a nei a, a chhuak dawn a nih chuan a man a to dawn a, Champions League khel phak club zawm a duh nia sawi a awm bawk.

Zanin dar 1:30-ah Palace-in Europa Conference League an khel dawn a, last 16 first leg-ah AEK Larnaca an mikhual dawn. Zaninah Wharton-a'n bul a ṭan a rinawm a, Selhurst Park-ah hnehna chan ngei an tum ang.