Mizoram sorkarin IFL-a Mizo club-te banah kai dawn

Mizoram sorkarin Indian Football League club Aizawl FC leh Chanmari FC hnenah nuai 25 ve ve an pek tur thu sports minister Lalnghinglova Hmarin (Tetea Hmar) Nilaini Assembly session-ah a sawi.

Tetea Hmar chuan, "I League kha Indian Football League tia thlak a ni tawh a, bana kaih aṭangin IFL club pahnih Aizawl FC leh Chanmari FC te nuai 25 ve vein sorkarin a kai dawn. IFL khel tur hian registration fee a ngai a, an zin vei vahna a ngai a, tun hmaa travel subsidy awm ṭhin a awm ta lo. Mizo ṭhalaite eizawnna siamtu an nih avangin chhungkaw tam tak ei bel an nih avangin Finance Minister leh Chief Minister kan sawipui a, ṭha min tihpui avangin kan dilna min tihhlawhtlinsak a, kan lawm hle," tiin a sawi.

IFL-ah hian tel man, participation fee hi nuai nga te a ni ṭhin a, kuminah erawh nuai 20 pek a ngai. GST nen phei chuan inelna hmachhawn tur ringawtin nuai 23.6 pek a ngai a, inelna ṭan hmain club tinin an pe fel tawh. Hei bakah hian club zawng zawngin nuai 50 an thawh a la ngai a, league member ni tur hian nuai 50 emaw Central League Expenditure za zela sawmruk (60%) hmun sawma ṭhen hmun khat (1/10th share) emaw a pe tur a ni, tih dan a awm.

Mizo club-te Mizoram footballer-te tana an inpekna a ropui a, sorkarin an hnahthawh ṭhat hriatpuiin nuai 25 ve ve a pe a, IFL-a Mizo club pahnih tan chanchin lawmawm a ni. Nimin khan Chanmari FC chuan thuchhuah siamin Mizoram sorkar chungah lawmthu an sawi.

Chanmari FC president Vanlalruatfamkima chuan "IFL khelh hi a hautak hle mai a, kan sorkarin a hautakna leh a nghawng ṭhatna hriaa min pui hi kan lawm takzet. Chief minister Lalduhoma chungah lawmthu kan sawi hmasa a. Kan bialtu MLA zahawm tak K Sapdanga, a tir aṭanga min puitu a ni. Tin, kan sports minister leh MFA president ni bawk Lalnghinglova Hmar pawhin kan mamawh tinreng min buaipui a, a India captain hlui leh MLA Jeje Lalpekhlua'n min thlawp ṭha a, an vaia chungah hian kan lawm takzet a ni," tiin a sawi.