Inrinniah Eldy Memorial Zone Tournament

Mizoram Footballers Hranghluite (MFH) chuan March 14, Inrinni hian hranghlui footballer mual liam ta Eldy pualin Eldy-a Memorial Zone Tournament an buatsaih dawn.

Inelna hi 1st Bn MAP Ground-ah khelh a ni ang a, Eldy khelhpui ṭhin hranghlui player-ten inelna an hmachhawn ang. Tun hma lama inkhel ṭhin player-te chu zone pali North, East, West leh South zone a ṭhen a ni.

Eldy hi Halkha, Chin State (Myanmar)-ah March 9, 1965 khan a piang a, naupan lai aṭanga infiamna ngaina niin football bakah volleyball a khel nasa. Football vangin a zin chhuak nasa a, March 1, 1988 khan Mizoram Police-ah lutin Mizoram aiawh bakah a chenna Armed Veng tan vawi tam a feh chhuak a, nomawi ṭhahnem tak a chawipui bawk.

Kum 1991 khan Eldy telna Mizoram team chu King's Cup, Bhutan-ah an champion a, Mizoram hminga foreign-a champion hmasa ber an ni. King's Cup-a an champion avang hian special two year increment an dawng a, he inelna hian vawi thum ngawt an champion a ni.