Valverde-a'n Man City a vel

13th March, 2026

Real Madrid-in UEFA Champions League-ah team ṭha bik an nihzia an pholang a, Nilaini zan khan Premier League club chhuanvawr Manchester City 3-0 in an sawp. Santiago Bernabeu-a inkhelah inhliam vangin Kylian Mbappe tel lo mah se Federico Valverde an kawl a, Uruguayan midfielder hian hattrick a siam a, goal class vek a ni.

Inkhelh ṭan hmain inhnehtawk tura ngaih ni mah se an inkhelh meuh chuan Real Madrid an chungnung. Ṭan phat aṭangin Los Blancos-in chance an nei nghal. Man City lamin chance nei ve bawk mah se goal an khung thei lo.

Minute 20-naah Thibaut Courtois-a ball pet chhuah chu through ball ṭha bik a ni a, dinglam aṭangin Valverde-a'n um lutin keeper ṭha Gianluigi Donnarumma a bum hnuah angle zim tak aṭangin a khung.

Valverde hian theihna sang tak a nei a, Toni Kroos pawhin amah thlak theitu a nih thu sawiin Uruguayan midfielder hian Germany legend hak ṭhin no. 8 a ha chhunzawm. Man City lakah erawh Valverde hi Toni Kroos ni loin Brazilian Ronaldo vanglai ang mai a ni thung.

Minute 27-naah Vini Jr ball pek chu Valverde-a'n vawi khatah a pet nghal a, Donnarumma meuh pawhin a dang thei lo. Valverde-a'n minute 42-naah Brahim Díaz a ball pek chu a thiam thil lantir nan a hmang. Real Madrid midfielder hian box chhunga a ball hmuh chu amah vengtu Marc Guéhi a pet khum zeuh hnuah chiang zetin a volley lut a, goal ropui a ni.

Second half-ah City rawn insiamṭhain Nico O'Reilly-a'n goal ruakah a khung lo a, Antoine Semenyo pawhin chance ṭha a hlah. Mahse, goal hmaah Real Madrid an hlauhawm zawk. Vini Jr-a'n penalty hlawh chhuak mah se Brazilian forward pet chu City keeper-in a dansak.

Hun tawp thlengin inkhel a nung ṭha a, O'Reilly-a'n Real midfielder Thiago Pitarch Pinar 'over confi' vangin chance nei mah se goal-ah a chantir thei lo - Courtois-a'n a dang ṭha ve bawk. Goal dang a luh belh lo a, Real 3-0 in an chak.

March 17, Thawh-lehni zan dar 1:30-ah Eithad Stadium-ah second leg khelh a ni dawn a, Pep Guardiola hoten thawhchhuah an tum dawn. Vini Jr-a'n penalty a khung loh zarah City-in beiseina tlem an neiah a ngaih theih.