City-in Dembele dawr lo

Paris Saint-Germain forward Ousmane Dembélé agent Moussa Sissoko chuan Manchester City nen inbiakna an nei anga sawi awm chu a pha a, a player chungchangah an inbiak loh thu a sawi.

Tun hnai khan Dembele agent Sissoko hi City sporting director Hugo Viana nen an inhmu a, khawthlang media ṭhenkhat chuan Manchester khawpuia Dembele lakluh dan tur chungchangah an indawr niin an sawi.

Mahse, Sissoko chuan Viana nen chuan ṭhian ṭha an nih anga inhmu mai an nih thu a sawi a, Dembele chungchangah inbiakna an neih loh thu a sawi - Viana nen an inhmu miau a, awih a har mai thei!

Kum 28 mi Dembele hian PSG-ah kum 2028 thleng khel turin contract a nei mek a, French club hian an player hi contract thar ziah tir ngei an tum niin an sawi. Mahse, he thu buatsaih a nih lai hian hmasawnna sawi tur a la awm lo.

Ballon d'Or kawl mektu Dembélé hian tun season-ah PSG tan inelna hrang hrangah match 27 khelin goal 12 a khung a, assist vawi sarih a nei. Ligue 1-ah hma an hruai mek a, Champions League-ah quarterfinal an luh ngei a rinawm bawk.

Ligue 1-ah hian table chung ber an luah mek a, Thawhlehnia Chelsea nen last 16 second leg an khelh hma chu match an nei rih lo. Hetihlai hian amah rimtu nia an sawi City erawh last 16 aṭanga tla thei dinhmunah an ding mek a, second leg khelh hmain match an la nei bawk!

City hian zanin dar 1:30-ah West Ham an lenchilh dawn a, Hammers hi tla thei dinhmunah an ding mek a, City tan a awlsam lo ang.