Zaninah MSL a hmuhnawm dawn

Mizoram Super League season 11 khelh meka club che ṭha pahnih Mission Veng Hotshots leh Zarkawt BCA te zanin dar 8:30 hian an inhmachhawn dawn. Inkhel hma hian Saron BC leh Chhinga Veng BC te zanin dar 5:30 hian an inhmachhawn bawk ang.

Saron par dawn em?

Saron BC-in match hmasa bera Khatla TBL an hneh nghal avangin phur hman viau mah se Saron hian BCA, Zemabawk BC leh Hotshots te hneh lo zuiin a zawnin vawi thum an chak lo. An record duhawm lo tak hi Chhinga Veng BC lakah thaichhiat an duh dawn a, Saron BC coach Marc Lalthlamuana Sailo (Tetea) chuan, "A zawna vawi thum kan chak loh avangin rilru a hnual lo thei lo a, mahse Chhinga Veng BC kan hneh ngei ngei a ngai a, theihtawp chhuahin kan khel ang," tiin Vanglaini a hrilh.

MSL kai thar Chhinga Veng BC in beisei an pha lo a, match nga khel tawhin vawi khat chiah hnehna an la chang. Chhinga Veng BC tan foreigner King Revolution a tlangnel nghal a, Saron lakah hnehna chan an tum a nih chuan an ram pawn player chet ṭhat bakah, Mizo player-ten an thlawp ṭhat a ngai dawn.

Intumtawk tur chu

Hotshots leh BCA ten season duhawm an hmang a, record nei ṭha ber pahnih an ni mek. Zanin an inkhel result hian table-a an dinhmun a tihdanglam theih dawn avangin inkhel hmuhnawm a beisei ngam.

MSL 11-ah Hotshots an zam lo a, Darnell Johnson hoin an hmuhnawm hle. Johnson hi tun season MSL-a ram pawn player hmuhnawm bera chhal ngam a ni a, Hotshots chakna hnar a ni.

Johnson bakah an Mizo player te an khel ṭha ṭhin a; Lalruatkima, K. Lalfakzuala leh Moses Zoremmawia ten an foreigner an thlawp ṭha ṭhin hle.

Hotshots coach Lalhruaitluanga (Ahruaia) chuan,"Club te zawk kan nih bakah kai thar kan ni a, beisei tihsan a har. Mahse kan ram pawn player te bakah kan Mizo player te an khel ṭha a, beisei ai ṭhaa kan khelh avangin kan phur a, BCA lakah pawh hnehna chan tumin theihtawp kan chhuah dawn," tiin Vanglaini a hrilh a, BCA an huphurh lo.

Hetihlai hian BCA kal fawr tur TBL-in an chelh a, Hotshots lakah an chetsual leh theih avangin hneh sa khelha khelh a thiang lo.

BCA coach K. Vanlalruata'n Vanglaini zawhna chhangin, "Hotshots hi zuam a thiang lo a, an foreigner Darnell Johnson bakah an Mizo player te an khelh ṭhat ṭhin vangin fimkhur takin kan khel dawn a. Kan player te an dam kim a, hnehna chan ngei kan inbeisei," a ti a, chetsual nawn an tum tawh lo.