Watkins-a'n Villa a chakpui

Ningani zan Europa League last 16 khelhah Aston Villa chuan 1-0 in Lille an hneh a, Villa tan Ollie Watkins-a'n goal awmchhun a khung a, an mikhualna ramah Villa a chakpui.

Stade Pierre Mauroy-a inkhelah Villa an hlauhawm hmasa zawk a, Morgan Rogers-a'n goal zawnah a pet thei lo thung. Lille-in chance an nei ve nghal a, Ngal'ayel Mukau-a'n tibuaitu nei lo chungin a pet goal thei lo.

Mualneitu an hlauhawm chhunzawm a, Olivier Giroud leh Romain Perraud ten an hun ṭha neih an chhawr ṭangkai thei lo ve ve. Team pahnihte goal hmaah an hriam tawk lo a, goal lut loin chawlhlawk an hmang.

Second half-ah Villa an insiamṭha a, minute 61-naah an chance neih hmasak ber an khung nghal. Ezri Konsa ball vawrh luh chu Emi Buendía-a'n a tauh per hnuah Watkins-a'n goal-ah a tauh nghal a, Lille keeper Berke Özer a tawlh hma avangin a ban phak lo.

Villa an hlauhawm chhunzawm a, Amadou Onana-a'n goal ban a pet per a, Watkins-a'n keeper chauh a hmachhawn hnuah a pet hman lo bawk a, an vannei tawk lo. Lille-in hun tawp thlenga goal an khung theih loh avangin Villa an chak.

Khualmualah chak mah se thlamuang takin Villa an awm hman lo a, Pathianni zan hian Manchester United an lenchilh leh nghal dawn. United hi Villa chung chiaha an awm avangin Unai Emery nauten Old Trafford-ah hnehna chan ngei an tum dawn.

United an hmachhawn zawhah March 19, Ninganiah second leg khel turin Lille an mikhual leh nghal dawn a, Villa hmabak a ko.

Inkhel dangah Premier League club Nottingham Forest an chak lo a, Forest hian an mualah Midtjylland 1-0 in an hneh lo a, Cho Gue sung-a goal khung chu chhanletna tur an nei lo.