BCA an tlu rei lo
Zarkawt BCA chuan an match hnuhnung berah Khatla TBL hneh lo mah se an insiamṭha leh nghal a, Ningani zan khan 87-70 in Chhinga Veng BC an hneh a, Mizoram Super League season 11 champion turin kawng dik an zawh zel.
Ningani zan vek hian Mission Veng Hotshots chuan 78-73 in Saron BC an hneh a, semifinal an beisei ve bawk.
BCA nge nge
TBL an hneh loh avangin BCA an hnual mai lo a, Chhinga Veng lakah champion ngun ber an nih chhan an lantir a, match li khelh tawhin vawi thum an chakna chiah a ni.
BCA tan plyer paruk ngawtin point 10 an score tling a, H.Lalhmachhuana'n point 23 neiin a score hnem ber a, Khatla South tlangval Hmachhuana hi player of the match-ah thlan a ni.
Hmachhuana bakah hian Mizo player dang - Zonunsanga (14), Lalhmingsanga (13) leh Lalnunpuia Renthlei (11) te an khel ṭha a, ram pawn player Caio Domingos Oliveira leh Arvinder Singh ten point 11 ve ve an score bawk a, BCA chak nan an ṭangkai hle.
Chhinga Veng BC tan foreigner King Revolution chuan point 24 a nei a, Vanlalchhuanawma'n point 17 nei bawk mah se an teammate te hnen aṭangin puihna an dawng ṭha tawk lo a, BCA lakah an tlawm.
Hotshots vs Saron
Inkhel hnuhnung zawkah Hotshot leh Saron te an inhmachhawn a, inkhel hmuhnawm leh inhnehtawk takah Hotshots an dingchang ta zawk.
Hotshots tan Darnell Johnson bawk a langsar a, Johnson hian point 25 leh 13 rebounds a nei a, MSL 11-a foreigner zingah a che ṭha ber pawl a ni mek.
Johnson hi Mizo player ten an thlawp ṭha a, Lalruatkima (22) leh player of the match Moses Zoremmawia (13) bakah, Zothansanga (11) ten Hotshots chak nan an thawh hlawk hle.
Saron BC an khel chhe bik lo a, captain T Lalhriatzela (18), Lalmalsawma (14), Ramdinfela (13) leh Hugo S Chotter (10) te khel chhe lo mah se an vanduai nawn a, point nga lekin an chak lo.
Tun season-ah Hotshots an khel ṭha a, match li khel tawhin vawi khat chiah an tlawm a, an chak loh ṭum hian point khat lekin Chanmari BC an hneh lo. Hotshots hian hnehna an chang chhunzawm thei a nih chuan semifinal bakah champion an sawi ri ngam tawh ang.