Chelsea-ah Reece James a rinawm

Club World Cup champion Chelsea captain Reece James chuan London club tan rinawmna thu a tiam a, kum ruk dang khelh chhunzawm turin contract thar a ziak - kum 2032 thleng chu Chelsea-ah hian a awm dawn tihna a ni.

Kum 26 mi James hi Chelsea academy chhuak niin, London club-ah hian captain a ni mek a, September 2019 khan Chelsea tana a match hmasa ber a khel - Blues tan inelna hrang hrangah match 225 khela goal 16 khungin, assist vawi 31 a nei tawh.

English defender hian Blues hi Premier League nomawi la chawipui lo mah se, Champions League, UEFA Conference League, UEFA Super Cup leh Club World Cup (2) ah te a champion pui tawh a, English football bikah nomawi a la chawi miah lo tihna a ni!

Reece James hi Chelsea player hlawh tam ber niin, a contract hmasaah khan kar khatah £250,000 a hlawh. A contract hmasa hi Todd Boehly leh Clearlake Capital ten kum 2022-a Chelsea an lei hlima a ziah niin, kum 2028-a tawp tur a ni.

Mahse, tunah contract thar a ziah hnan a, a contract tharah hian a hlawh tlem zawk niin media ṭhenkhat chuan an tarlang. Blue Co-in Blues an lei hnu hian, khelh dan a zira bonus dawn theih chu hlawhah hian nasa taka belhin, hlawk lak ngei ngei tur kha an titlem thung.

Reece James pawh hian hetiang behchhan hian contract hi a ziak niin an sawi a, mimal leh club an chet ṭhat dan a zirin a hlawh a pung hluai thei thung tihna a ni ber.

James hi hliamin a tibuai ve fo a, December 2023 khan a buai fona a malpui hliam chu a zai. Tun season erawh hliam mang loin hun a hmang a, inelna hrang hrangah match 35 khel tawhin, goal hnih a khung bakah assist vawi sarih a nei.

Hetihrual hian Chelsea hian tun season-ah beisei an phak lo a, coach pawh pahnih an nei tawh. Champions League last 16 first leg-ah Paris Saint-Germain-in 5-2 in an sawp a, tla thei dinhmunah an ding mek.

EPL lamah pawh Champions League khel phak lo thei dinhmunah an ding mek a, zanin dar 11:00 hian Newcastle United an mikhual dawn - Thawhlehniah PSG an mikhual zui dawn a, coach Liam Rosenior tan team rem thiam a pawimawh ang.