East Bengal tan insiamṭhat hun a thleng

Kolkata club hlun East Bengal-in beiseina sang tak nen Indian Super League season bul an ṭan a, match hmasa pahnihah chak nghalin, goal sarih ngawt an khung a, an lamah goal khat chiah a lut.

Mahse, Jamshedpur lakah 2-1 a tawlhthluin, FC Goa an inhnehtawkpui zui a, match hnih a zawnin an chak zo tawh lo - league match 13 chiah khelh a nih dawn avangin match hnih chak zawh loh hi pawi tak a ni.

Kolkata club hian vawiin tlai dar 5:00-ah an tihsualte siam ṭha turin hun ṭha an nei dawn a, Kerala Blasters an mikhual dawn - South Indian club hi tun season ISL-ah an la chak miah lo!

East Bengal tan Edmund Lalrindika chu player pawimawh a ni a, league match li khelh tawhah goal hnih khungin, assist vawi khat a nei - defender Lalchungnunga'n hmun pawimawh a chang ṭhin bawk.

ISL match hnih ngawt East Bengal an chak zawh tawh loh laiin, Mohun Bagan erawh match li an khelhah an la chak vek a, zanin dar 7:30 hian Bengaluru chu khualmualah an lenchilh dawn bawk.

Bangalore club hian Lalremtluanga Fanai (Tluangtea) an nei a, Bawngkawn tlangval hi midfielder pawimawh a ni phak - Sergio Lobera kaihhruaina hnuaia khel Bagan tan Lalengmawia Ralte (Apuia) a langsar ṭhin viau bawk.

Bengaluru hi league match hnih a zawna an chak zawh loh hnuin, Mohammedan SC khelmualah 2-1 in an chak a, zaninah Bagan kaltluang lai chelh ding turin an inringtawk ang.