Kulikawn an thiam ber

Mahuma Memorial Cricket Tournament 2016 champion chu Kulikawn Cricket Club an ni. Nimin khan Suaka Memorial Cricket Ground, Sihhmuiah final khelh a ni a, Kulikawn hian inkhel hmuhnawm takah league match-a an ngam tawh loh Chanmarians hi run kuain an hneh - season hnih chhung a zawna 1st Division champion an nihna chiah a ni.

Ṭhazuala a ṭha

Ṭhum vawra vannei zawk Kulikawnin bat hmasak an thlang a, beisei an phak lo hle. Opener Michael Lalremkima'n run hnih chiah a siam hman tihin a out nghal a, Kulikawn innghahna Prasenjit Sarkar-a'n run 17 siamin engruai a ni bik lo. Kulikawn tana run siam hnem ber Lalbiaktluanga Ralte chuan ball 48-ah run 18 chiah a vaw chhuak thei a, Chanmarians spin bowler Lalṭhazuala chu Kulikawn batsman tan mangchhia a ni.

Tuikhuahtlang tlangval hian over 7.3 lek a vawmah run kua chiah pein wicket li a la a, a vawm ṭha takzet. Kulikawn hian over 32.3-ah run 67 bak tlin thei loin player 10 an hloh a, Chanmarians tan champion beiseina a sang.

Mahse maw...

Chanmarians tan chak turin run 68 bak siam a ngai lo a, thil harsa niin a lang lo. Mahse, Kulikawn tan captain Michael-a'n batting lama a chet ṭhat loh thup nan bowling lamah a thiam thil a pholang a, over riat lek a vawmah run 15 chiah pea wicket nga lain Chanmarians batsman-te a sawi sa. President's Cup champion team hian over 22.2-ah run 58 chiah tlina wicket hloh vekin a tlawm zawkah an ṭang ta a ni.

League round-a Chhinga Veng chiah hneh loh nei Chanmarians tan run 17 siamtu Lalhmangaiha chu run siam hnem ber a ni a, player dang zingah run 10 siam tling thei an awm lo - champion tum tan a chhe mah mah.

Players che ṭha

Mahuma Memorial Cricket Tournament 2016-ah mimal lawmman sem a ni a, Kulikawn batsman Prasenjit Sarkar chu Best Batsman-ah thlan a ni. Assam tan age level hrang hranga lo inlan tawh Silchar tlangval hian match sarih a khelhah ball 346 hmachhawnin run 288 a vaw chhuak a, tun tournament-a average hi 41.14 niin Kulikawn champion-na kawngah a thawhhlawk hle.

Kuikawn captain Michael-a hnathawh hmuh hmaih theih a ni lo a, Best Bowler leh Player of the tournament-ah thlan a ni. Kulikawn all-rounder hian match kua a khelhah over 59.5 vawmin run 178 chiah a pe a, wicket 30 a la. Batting lamah pawh Michael-a'n a thawh hlawk a, Kulikawn tlangval hian run 169 vaw chhuakin tun tournament-a a average hi 21.12 niin Kulikawn innghahna a ni.