Zohminga Kan chan ta

Mizoram Police goal-keeper ṭha H. Zohmingliana chu nimin khan Grace Hospital-ah cancer natna vangin a thi.

Zohminga hi kum 54-a upa a ni a, vawiin chhun dar 12:00 hian Electric Veng thlanmualah vui liam a ni ang. Police keeper hlui hian a nupui Vanlalkimi leh a fate pali a kalsan a ni.

Mizoram Police-in tual-chhung football an thunun chhoh hun laia number 1 keeper Zohminga hian sulhnu ṭha tak a hnutchhiah a. Police team hi Bhutan King's Cup-ah vawi thum a champion pui a, tualchhung football-ah nomawi engemaw zat a chawi bakah Mizoram aiawhin vawi duai lo a feh chhuak bawk.