MotoGP 2016 Thlirletna Rider pakuain hnehna an chang!

March 20, 2016 a ni a. Floodlights hnuaiah MotoGP 2016 season hawn nan Qatar Grand Prix tlan a ni. He season hian zawhna tam tak a rawn keng tel nghal a; Marc Marquez chu a vawi thum nan world champion a ni thei ang em tih te, champion lai Jorge Lorenzo-a'n a lalukhum a hum him thei ang em tih pawh mipui hriat châk a ni.

Heng a chunga zawhna lian tak pahnih tluk zeta bike intlansiak ngainatute beng verhtu leh hmuh châk chu Valentino Rossi hian a vawi 10 nan world title a la thei a ngem tih chu a ni - Novemver 13-a Valencia Grand Prix tlan zawh a nih chuan heng zawhna zawng zawng hi chhanin a awm.

Kumin MotoGP hi a season 68-na a ni a, intlansiak vawi 18 awmin rider 28 an inel. Hondo rider Marquez chu hnehna chang hnem ber niin intlansiak pangaah hnehna a chang. Kum 23-a upa Marquez hi Japanese Grand Prix-a hnehna a chan chiahin rider dang tan umphak theih a ni tawh lo, intlansiak hmabak pathum la awm chungin world champion a ni der tawh.

Marquez a ropui

Cervera, Catalonia, Spain-a piang Marquez tan kumin hi season duhawm tak a ni chiang hle. A elpui Rossi leh Lorenzo te hneh chunga lallukhum khum tluka dinhmun ṭha leh thlanawm hi a awm thei kher chuang lo ang.

Marquez hi bike intlansiak chi thuma world champion a nih theih avangin khawvela rider ropui hming dai tawh lo tur Mike Hailwood, Phil Read leh Valentino Rossi te huangah a hming ziah luh a ni tawh. Kumina a champion leh chiah khan khawvela bike intlansiakna sang bera vawi thum champion thei hmasa ber a ni bawk.

Bike khalh tura hriak thih Marquez hian kum 2013
aṭang chauhin MotoGP hi luh-chilh mah se hnuhma ṭha leh chhinchhiah tlak tam tak a hnut chhiah tawh a, heng zinga langsar leh hriathlawh tak pakhat chu a season khatnaa a champion nghal thei kha a ni.

Kum 1978 khan Kenny Roberts chu MotoGP-a a season khatnaah a lo champion tawh a, kum 35 zet hnuah Marquez hian he record ang hi a rawn nei ve leh chiah. Roberts leh Marquez te chiah hi Moto GP-a an season khatnaa champion thei an ni bawk.

Rossi a tlo

Rider inel 28 zinga tlo ber pakhat chu kum 37-a upa Rossi a ni. Yamaha rider hian vawi hnih chiah hnehna chang mah se kum tluanin tlak hniam lutuk lai nei loin a tlan tluan thei a, point 249 hmuin a tluk loh chu point 298 hmutu Marquez chiah a ni. Italian rider ropui hian tun hnai season thum chhung ṭha takin hun hmang thei mah se a vannei tawk lo a, pahnihnaah season a khar ziah.

Spanish rider Lorenzo-a'n season bul a ṭan ṭha hle a, intlansiak hmasa parukah vawi thum hnehna a chan theih a vangin a champion nomawi chu harsa lutuk loa humhim thei ngei tura ngaih a ni. Yamaha bike a khalh season hnuhnung berah Lorenzo hian beisei a phak chhunzawm lo a, season tluanin vawi li hnehna chang thei mah se a pumpuiah point 233 hmuin pathumna a ni hram.

Kum 29-a upa Lorenzo hi 2010, 2012 leh 2015 MotoGP world champion a lo ni tawh a, season tharah chuan Andrea Dovizioso nen Ducati bike an khalh tawh ang. Lorenzo hmun ruak luah khat tur hian Team Suzuki Ecstar rider hlui Maverick Vinales chuan Yamaha bike a khalh ve tawh thung ang.

An inel tawk

Kumin hi kum dang zawng aia rider an intluktlan kum a ni awm e! Cal Crutchlow, Jack Mil-ler, Andrea Iannone leh Maverick Vinales te chuan a vawi khat nan MotoGP inelnaah hnehna an chang.

May thlaa tlan Italian Grand Prix leh September thla a tlan zawh tak San Marino Grand Prix inkarah khan rider pariat - Lorenzo, Rossi, Miller, Márquez, Iannone, Crutchlow, Vinales leh Dani Pedrosa ten hnehna an chang. Kum 1999 khan rider pasarihin a indawtin hnehna an lo chang tawh a, kumin hian rider hrang hrangin a zawna hnehna an inchan chhawk rei ber record thar an siam.

Malaysia-a Andrea Dovi-zioso-a'n hnehna a chan chiah khan kumina rider hnehna chang thei pakua an awmna chiah a ni. Kum 2000 khan rider hrang hrang pariatin hnehna an lo chang tawh, kum 15 chhung record lo awm tawh pawh hi thaichhiatin a awm bawk.

Season thar hi MotoGP season 69-na tur a ni dawn. Ruahman dan chuan intlansiak hi vawi 18 neih tur a ni ang a, a hmasa ber atan March 3 khian Qatar-ah an tlan ang - a hnuhnung ber chu November 12-ah Valencia GP tlan a ni ang.