Mahni khelmual hmangthiam Dortmund
Borussia Dortmund chuan tun season chhungin Signal Iduna Park-ah hneh loh an la tawng lo. Thomas Tuchel-a naute hi Thawhlehni zan khan Augsburg nen 1-1 in an inhnehtawk.
Kumina an league match hnuhnung berah Dortmund hian hnehna chang zo lo mah se an khelmuala tlawm miah lo chunga kum tawp an thlen theih avangin lawmna tur a awm tho. Kum 2016 pumpui bikah chuan August thla khan DFL Supercup-ah Bayern Munich an ngam lo.
Dortmund tan hian kum 2021 thleng cham tura contract thar ziak hlim Julian Weigl-a'n inkhel bul a ṭan a, khelmual chhunga langsar hmasa ber chu Mario Gotze niin Germany internatuional hian goal ban a pet per. Mikhual Augsburg-in counter attack hmang ṭangkaiin Ji Dong-won hmangin minute 33-naah goal hmahruai an khung.
Bundesliga top scorer ni mek Pierre-Emerick Aubameyang chuan chawlhlawk hmain an siphurh sutna hun ṭha nei mahse a chhawr ṭangkai thei lo. Second half ṭan tirah Ousmane Dembele hmangin Dortmund-in an siphurh an sut.
Manchester United midfiel-der hlui Shinji Kagawa chuan penaty hlawhchhuah inbei-sei mah se pek a ni lo a, Aubameyang leh Andre Schurrle te vanneih ni a nih miau loh avangin goal dang a lut zui tawh lo. Dortmund hian an league match hnuhnung 10-ah vawi khat chiah chak loh an nei a, vawi ruk zet chu an khingpuite nen an inhnehtawk thung.
Tuchel-a'n Dortmund league match vawi 50 a enkawl tlin nia an chak loh chhan sawiin, "Inkhel bul kan ṭan ṭhain ka nauten an khel ṭha em em a, eng vanga hnehna chang lo nge kan nih kha hriatthiam a har zawk hial," a ti.
Tuchel chuan sawi chhun-zawmin, "Inkhel pumpui kan thlir chuan tihsual kan ngah tih chu ka pawm a, hei chu a chhan lian ber a ni lo. Kan hun ṭha neih kan chhawr ṭangkai thei lo a, anni lamin kan tihsual zeuhah min hrem thei nghal si. League hmahruaitu nen kan inthlauhna zau deuh tawhin lang mah se kan zam lo a, season chawhnu lamah ṭha zawkin kan inlan leh ang," tiin a sawi.
Dortmund hian league match 16 khelh tawh aṭanga point 27 hmuin Bundesliga table-ah palina an ni mek a, league hmahruaitu Bayern Munich an phak lohna chu point kua lai a ni tawh.