Tennis hawiher thlaktu Murray leh Kerber

World number 1 sawi apiangin rilruah Novak Djokovic a lo lang a, hmeichhe lamah chuan sawi ngai loin Serena Williams hmel chu kan mitthlaa lo lang hmasa a ni ṭhin. Kum 2016 a herliam dawn meuh chuan heng player lian pahnihte hian ngam loh an nei - an hming chu Andy Murray leh Angelique Kerber te an ni.

Novak chungah Murray

Kumin season bulṭan nan kum dang ang bawkin Australian Open khelh a ni a, final-ah Djokovic-a'n Murray a hneh. Clay court lamah pawh Serbian tlangval hian ro a rel chhunzawm a, a vawi khat nan French Open-ah a champion - Paris-ah pawh hian final-ah Murray bawk a hneh leh.

June thla a thlen chuan Djoko-vic-a'n Grand Slam nomawi pali a kawl khawm vek! Kum 1969 khan Rod Laver chuan major title hi ṭum khatah a lo kawl khawm vek tawh a, hemi huna hetiang dinhmun luah leh thei hmasa ber chu Djokovic hi a ni. Hetih hunlai hi chuan Murray tan world number 1 nih chu beisei ngam chi a ni lo.

Amaherawhchu, beisei leh rin ang ngawtin thil a kal lo. Wimbledon khelh a ni a, a vawi hnih nan khawtual tlangval Murray a champion. Britain tlangval hian Rio Olympic-ah ram tan gold medal a vaw chhuak leh bawk. Brazil-a infiamna khawmpui lian hman a nih hnuah Murray hian nomawi dang paruk a chawi belh a, match thum chiah chak loh a nei.

Kum 29-a upa Murray hian kuminah match 78 zet hnehna changin a seson ṭhat ber ṭum a ni a, match 24 chhung zet chu hneh loh nei loin a kal tluang bawk. Season khar nana an khelh ṭhin, a thiam pariatte inelna ATP World Tour Finals-ah champion zuiin world number 1 ni chungin season a khar.

Grand Slam vawi thum cham-pion tawh Murray hian world number 1 ni chungin season thar bul a ṭan dawn a, final vawi nga a khelh tawha a la champion miah lohna Australian Open-ah seeded pakhatna a ni ang.

Serena ngamtu Kerber

Kum 28-a upa Kerber hian world number 10 ni chungin kum bul a ṭan a, nomawi pali kawl sa chungin a seaon bul a hmang ṭan. Australian Open final-ah Serena Williams hnehin Steffi Graf tih lohah chuan German nula he hmuna nomawi chawi leh thei hmasa ber a ni.

Grand Slam vawi 21 cham-pion tawh Serena tan major title la hnem ber Steffi (22 titles) tluk theihna hun ṭha a thaichhiat sak. American thiampuinu Serena hian French Open final-ah Garbine Muguruza a hneh lo leh bawk.

Mahse, Serena a tlu hlen lo. Wimbledon-ah a rawn ding chhuak, Kerber hnehin a major title 22-na a rawn hlawh chhuak a, recod thar siam theihna hun a neih US Open-ah erawh beisei angin a hlawhtling zui ta bik lo a, he inelnaah hian Kerber-i'n nomawi a chawi ve leh thung.

Kerber hian kumina Grand Slam inelna pali awm zinga pa-thumah final a lut a, vawi hnih a champion. Tun season chhungin match 68-ah hnehna changin vawi 18 chu a chak lo thung. Australian leh US Open bakah Stuttgart Open-ah te a champion a, Brisbane, Wimbledon, Rio Olympics, Cincinnati leh WTA Finals-ah te pahnihna a ni thung.

German nula hian nomawi chawi tam tawk lo mahse season tluanin hliam nei loin a khel tluan thei a, tlakhniam duai lai nei lo leh ngelnghet taka a khelh rei theihna chu world number 1 dinhmuna hlangkaitu pawimawh a ni.