Match nga khel lo tur Shelvey

Newcastle United midfielder Jonjo Shelvey chu chi inthliarna lam hawia ṭawngkam a neih avangin match nga chhung khel thei lo tura hrem a ni a, £100,000 chawitir bawk niin Football Association education course a chhim bawk ang.

Kum 24-a upa midfielder hian September 17-a Wolves an hmachhawn ṭumin Moroccan midfielder Romain Saiss lakah chi inthliarna lam hawi ṭawngkam hi a hmang a, FA chuan hremna hi a ti chhuak ta a ni. Liverpool leh Swansea midfielder hlui hian a duh chuan hremna hi ni sarih chhungin a khinglet thei dawn a ni.

Newcastle chuan FA hnen aṭanga ziaka engkim an dawn fel hma loh chuan Shelvey chungchangah thuchhuah an neih loh tur thu an sawi a, England tana vawi ruk inlan tawh midfielder hremna hi khinlet a nih erawh chuan ngaihtuah a nih chhungin hremna hi kalpui a ni rih lo ang.

Rafael Benitez-a enkawl Magpies hian Championship-ah match 22 khel tawhin table chung berah an awm a, an hnuai chiaha awm Brighton & Hove Albion aia an sanna chu point khat niin pathumna Reading aiin point kua laiin an sang tawh thung.