Australian Open khel lo tur Kvitova

Wimbledon vawi hnih champion tawh Petra Kvitova chu Thawhlehni khan ama chenna inah misualin chemte hmangin a bei a, a banah hliam a tuar. A hliam hi zai a nih hnuah thla thum chhung tennis a khelh theih loh tur thu an puang.

Kum 26-a upa hian amah tihnat tumtu lak a-ṭanga thi loa a chhuak thei chu lawmawm a tih thu a lo sawi tawh a, racquet a vawnna ban vei lam hi a tihrawl a nat bakah a thisenzam a khawih bawk.

A thu puangtu Katie Spellman chuan, "Kvitova hliam hi rin aiin alo nasa a, darkar thum leh minute 45 chhung lai zai a ni. Mahse, amah zaitu doctor chuan a kum a la naupan avang leh a hriselna a ṭhat avangin reilote hnuah tennis a khelh leh theih ngei a beisei thu a sawi," a ti.

Czech Republic star Kvitova hi a hliam vang hian nakkum January thla a khelh tur Grand Slam hma-sa ber Australian Open-ah a inlan thei dawn lo tihna a ni.