2016 AIFF Awards Player of the year Jeje Lalpekhlua
India rama footballer ṭha ber chu Mizo tlangval a ni. Nimin khan AIFF president Praful Patel chuan Annual General Body Meeting, Delhi-a neihah Jeje Lalpekhlua chu 2016 AIFF Player of the Year a nih thu a puang a, Hnahthial tlangval hian hmingṭhatna bakah Rs 2,50,000 leh nomawi a dawng tel ang.
Mizo tan Jeje
Jeje hi academy ṭha aṭanga inzir chhuak a ni lo a, Mizoram Football Asso-ciation kaihhruaina hnuaiah Mizoram junior team tan khelin heta ṭang hian India junior team tana khel tura koh a ni a, phai lam club-in an hmelhriat ṭan bawk.
Hnahthial tlangval Jeje hian hlawh-tlinna a chan hnuah amah siam liantu MFA a theihngilh lo a, a pawisa dawn tur aṭangin Mizorama football thuneitu sang ber hnenah cheng nuai khat a pe ang. Chennaiyin FC striker Jeje chuan, "MFA vanga tun dinhmun thleng thei hi ka ni a, player naupang ṭha zawk an chher zel theih nana ṭanpui let hi ka bat a ni," tiin MFA ṭanpui let thei dihmuna a ding chu a lawm thu a sawi.
Pa Hlawthling
F. Liankima leh Ngunhnunpuii te fapa Jeje hi Mizo footballer hlawhtling ber a ni a, India senior team tan vawi 37 zet inlan tawhin goal 16 a khung tawh a, captain armband hial a hreng tawh bawk. SAFF Cup-ah Jeje hian India vawi thum a champion pui tawh a, Bhaichung Bhutia nen SAFF Cup nomawi chawi hnem ber an ni.
Mizo tlangval Jeje hian Mohun Bagan chu I League leh Federation Cup-ah a champion pui tawh a, Indian Super League-ah Chennaiyin FC chu a champion pui tawh bawk. ISL season thum khelh tawh aṭangin Hnahthial tlangval hian goal 14 a khung a, Jeje-a tluk loh chu foreign striker Iain Hume (23 goals) leh Stiven Mendoza (17) te chiah an ni.
Jeje hi Indian zinga ISL-a goal khung tam ber a ni a, Hnahthial tlangval hnaih bertu Sunil Chhetri pawhin a khung zat chanve goal sarih chiah a khung.
AIFF Player of the Year chawi-mawi-na a dawn hma hian Jeje-a'n mimal chawimawina chi hrang hrang a lo dawng tawh a, chung zinga langsar deuh te chu FPAI Best Young Player Award (2010-11), AIFF Emerging Player of the Year (2013), ISL Emerging Player of the League (2015), 2015-16 Federation Cup top scorer leh best player bakah FPAI Indian Player of the Year (2015-16) te an ni.
Vanglaini biangbiakna
Indian footballer of the year nih i inbeisei ve reng em?
Jeje : Kum dangah chuan ka la inbeisei ngai lo a, tun ṭum hi chu ka inbeisei ve reng mai.
Tun Award hi i tan eng ang chiaha hlu nge?
Jeje : A ber nih hi thil har a ni. Award dawng turin khelmual chhungah khelh ṭhat a ngai a, inhliam lohte a pawimawh a, chu chu kan tih theih bak a ni. Chuvangin chawimawina sang dawng tur hian vanneihna neih a ṭul a ni. Award dang ka ngaihlu lo tihna ni loin tuna ka award dawn hi ka dah sang ber a, ka ngaihlu ber bawk.
Award dawn theihna kawnga pawimawh te?
Jeje : A hmasa berah chuan Pathian chungah ka lawm a ni. Keimah chauh chuan tuna chawimawina hi dawng thei ka ni lo, ka khelhpuite zawng zawng - India national team, Chennaiyin FC leh Mohun Bagan lama ka khelh puite, coaching staff leh management lam te, Mizo mipuite leh min support-tu zawng zawngte avang chauha dawng thei ka ni a. An chungah lawmthu ka sawi vek bawk a ni.
Award hian chona nge phurrit a ken tel?
Jeje : Pathian zarah award neuh neuh ka dawng ve ta a. Heng ka award dawn a te ber aṭanga a lian ber thlengin keimahah chona nasa tak min pek phah a ni.
I League-a club khelhna tur?
Jeje : I league lama ka khelhna tur hi a chiang thawkhat tawh a, mah se eng emaw tih tur a la awm avangin ka la puang chhuak thei lo deuh. Pathian zara engkim a kal tluan chuan ni hnih hnu velah chuan ka puan chhuah theih ka beisei.
Mizoram ngeia competitive match khelh i nghakhlel tawh em?
Jeje : I League season liam ta khan national team-in khelh tur kan neih avangin Mizoramah ka rawn zin ve thei ta lo. Tun season-ah erawh RG Stadium-ah ka inkhelh theih ngei ka beisei a, Mizorama I League khelh hi ka châk takzet. Mizo mipui min ṭantute hma ngeia khelh aia châk ka nei chuang lo.
I League hi Kolkata club hian eng ang chiahin nge an ngaih?
Jeje : Eng league pawh ni sela Calcutta Football League pawh nise Kolkata lam club a bikin Mohun Bagan leh East Bengal te hi chuan an ngai thutak ṭhin khawp mai. Tun season hi I League tawpna tura ngaih a ni a, season dang zawng aiin boruak a sang zawk ang. East Bengal-in champion ngei tumin player an lei nasa a, Mohun Bagan pawh champion nawn an tum viau a ni.
ISL-ah lungawi lohna leh lawmna tur te i nei em?
Jeje : Kumin ISL chu kan hmang ṭha lo, kan tum ber chu champion ni mah se semifinal kan thleng zo ta lo. League round match hnuhnung pathum ka inhliam avanga ka khelh zawm thei lo erawh pawi ka ti khawp mai. Mahse Mizo pahnih Robert leh Didika te awmna Atletico de Kolkata an champion tho a, a lawmawm viauin ka hria.
Season tharah eng nge i target?
Jeje : Season thar chu club tinte an inlak ṭhat avangin ṭan a ngai lehzual dawn khawp mai. Keimah bikah theihtawp tak meuh meuh a ṭan a ngai a ni. I League, Federation Cup leh AFC Cup-ah te champion thei turin theihtawp chhuah a, ka club tana a tam thei ang ber goal khung ka tum bawk ang.
Chhetri nen an khaikhin thin che a, pressure a tam phah em?
Jeje : Sunil Chhetri hi player ṭha tak, fing tak leh game thlak thei khawp a ṭha a ni. Amah nena min khaikhin hi ka lawm a mah se Chhetri leh keimah chu mihrang hlauh kan ni.
Kei chuan keima game ka khel a, ka club leh national team tan ka theihna zawng zawngin ka khel ṭhin. Team tana khelh ka duh a, ka pet goal a chakloh ai chuan team chakna ka ngai pawimawh zawk a, chuvang chuan khelmual chhungah theihtawp ka chhuah ṭhin. Chettri nena min khaikhin vang hian pressure ka neih phah lo.
Hmasawn zel theih i la inbeisei em?
Jeje : Eng kawng pawh ni sela kan thlen chinah kan duh tawk chuan hmasawn leh a har em em tawh ṭhin. Kei pawh football-ah zinkawng ka ṭan ve dawn chauh a ni a, ka hmabak a la tam khawp mai. Pathian zarah ka dam anga theihtawp ka chhuah zel ang a, a hma aia nasain ka bei ang. Hnamdang Mizoram hre lo zingah Mizoram hming tilang zel turin theihtawp ka chhuah zel ang.
Lawmthu sawina
Jeje : Mizo hnahthlak khawvel hmun hrang hranga awmte zawng zawng chungah min support-na zawng zawng avangin ka lawm takzet a ni. Kan kal lehzelna turah Mizo player zawng zawngte ṭawngṭainaah minlo hre ve reng turin ka chah duh bawk a ni.
AIFF Player of the Year
1992 IM Vijayan
1993 VP Sathyan
1994 Jo Paul Ancheri
1995 Bhaichung Bhutia
1996 Bruno Coutinho
1997 IM Vijayan
2000 IM Vijayan
2001 Jo Paul Ancheri
2002 Deepak Mondal
2003 Tomba Singh
2004 S. Venkatesh
2005 Climax Lawrence
2006 Surkumar Singh
2007 Sunil Chhetri
2008 Bhaichung Bhutia
2009 Subrata Paul
2010 Gouramangi Singh
2011 Sunil Chhetri
2012 Syed Rahim Nabi
2013 Sunil Chhetri
2014 Sunil Chhetri
2015 Eugeneson Lyngdoh
2016 Jeje Lalpekhlua