PSG laka comeback theih beiseitu Chelsea
Kar liam ta zet chu - Chelsea fans nih a nawm loh vanglai a ni mai thei! Blues hian Champions League round of 16 first leg-ah 5-2 ngawtin Paris Saint-Germain an ngam lo a, Premier League-ah top four an beiseina pawh thamral mekin, Newcastle United lakah 1-0 in an tlawm zui.
Mahse, Chelsea boss Liam Rosenior-a'n beisei a la nei a, Champions League quarterfinal an luh theih a la ring tlat - Blues hian zanin dar 1:30-ah PSG an mikhual dawn a, comeback tur chuan si thum fai tala an chak a ngai dawn.
Chelsea coach Rosenior chuan, "Champions League-ah hian 'comeback' ropui tak tak kan lo hmu tawh ṭhin a, Stamford Bridge-ah ngei pawh comeback hmuhnawm tak tak kan lo hmu tawh ṭhin. Result thlak danglam turin kan theihna zawng zawng kan hlan dawn a ni," a ti.
Hetihrual hian Blues hian an beisei goal zat lo khung thei ta tehreng pawh ni se, PSG laka goal chhuah loh hi a harsa dawn - French club hian tlarhmaa khel turin Khvicha Kvaratskhelia, Desire Doue, Bradley Barcola leh Ballon d'Or kawltu Ousmane Dembele te ho an nei a, an tha a za leh khawp ang.
French club tan Fabian Ruiz la inhliam rih mah se, Joao Neves leh Vitinha te ho midfield-ah an awm avangin an chhelo tih a chiang a, tlarhnungah ni se, tawnhriat nei ṭha Marquinhos leh Achraf Hakimi te ho an la awm cheu bawk.
Mahse, Chelsea captain Reece James chuan inringtawk tak chunga second leg an hmachhawn tur thu a sawi. English full back chuan, "Result kan thlak danglam thei ngei a ni, tih beisei leh ring chungin kan khel ang.
"He squad hian inrintawkna sang tak kan nei a, hun harsa aṭangin kan ding chhuak leh thei tih vawi tam kan lantir tawh bawk," a ti a, a ṭhiante a ringtawk hle.
Mahse, Chelsea hian league match harsa khel a, Magpies an ngam loh laiin PSG erawh league lamah an lo awl thung a, Chelsea an hneh zawh rual chiah khan Stamford Bridge pan turin an inbuatsaih leh thei nghal tihna a ni - hei ringawt pawh hi Paris club tan chuan 'advantage' a tling.
Hetihrual hian London club hi mahni muala khel tur an ni a, squad an nei ṭha bawk - Cole Palmer, Pedro Neto leh Enzo Fernandez te hi PSG tana buaina thlen turin an ṭha tawk a, Magpies laka ngawichawi tak Joao Pedro tan pawh a puin a sawi anga 'world class' a ni tak tak a nih chuan tun hi theihna pholan hun a ni.
PSG nen an intawn hmasakah Chelsea goalkeeper Filip Jorgensen a chesual a, zaninah chuan Robert Sanchez-a'n a thlak a rinawm - Chelsea tan treble champion PSG lehthal turin si thum fai tala chak a ngai a, Stamford Bridge a nih miau avangin beiseina an nei a nih pawhin an demawm lo e.