Mumbai tan LZ Chhangte a vul leh ta

Lallianzuala Chhangte tak tak kan hmu leh ta - Pathianni zan khan Indian Super League inkhelah Mumbai City chuan 2-1 in Inter Kashi an hneh a, Mumbai tan Lallianzuala Chhangte chuan chakna goal a khung.

Inter Kashi khelmualah Mumbai tan Noufal PN chuan goal hmahruai khungin, first half hun pek belhah a khung - Lianzuala corner pet aṭanga a khung a ni.

Second half ṭan aṭanga minute rukna lekah Rohit Danu hmangin Inter Kashi hian an chhanglet a, 1-1 a ni. Mahse, an hlim authawm pawh a reh fel hman lo! Minute khat pawh a liam hman lo tihah Lallianzuala Chhangte inlarin, Mumbai captain hian an team goal hnihna a khung a, 2-1 in an chak.

ISL match hnih ngawt an khingpui an draw hnuah Mumbai an chak ve leh ta a, league match nga khelh tawhah tlawm an la nei lo - Inter Kashi laka assist leh goal neitu Lianzuala'n goal thum a khung tling ta der.

Mumbai tan LZa bakah Hmingthanmawia Ralte (Valpuia) leh Lalnuntluanga Bawitlung ten inkhel bul an ṭan a, bench aṭangin Zothanpuia a lut bawk - Valpuia hi hun pek belh minute linaah hnawhchhuah a ni a, Mumbai-in an tuar hman lo.

Tun season-a a vawi khat nan Jamshedpur an tlawm bawk a, a hnehtu chu chak la nei lo NorthEast United an ni - Highlander tan Real Madrid academy chhuak midfielder Andy Rodríguez chuan goal hnih a khung a, JFC-in Raphael Messi Bouli hmangin khung ve mah se, scoreline cheimawina mai a ni.

Jamshedpur tan Mark Zothanpuia'n a dan pangngaiin inkhel bul a ṭan a, C. Lalhriatpuia chu bench aṭangin a lut thung - Highlander tan Fredy Chawngthansanga chu bench aṭanga luhtir a ni bawk a, Lalrinzuala leh Lalbiakdika te an lut lo.