Arsenal tan fiahna hun a thleng

Zanin dar 1:30 hian Arsenal chuan Champions League last 16 second leg an khel dawn a, an mikhual tur hi Bayer Leverkusen an nih avangin Gunners-in rin an hlawh zawk - first leg-ah team pahnih hi 1-1 in an lo inhnehtawk tawh.

Mahse, Germany-a first leg inkhel en chuan Arsenal vanneihna an hmu thiam ang tih a chiang a, Leverkusen hian Gunners an chelh kha tihpalh thil a ni lo tih pholangin, kartawp Bundesliga inkhelah Bayern Munich chu 1-1 in an draw bawk.

Leverkusen an inringtawk sawt ang tih a chiang a, chutihrual chuan Bayern laka goal a khung zanah Spain international Aleix Garcia a inhliam a, kum 29 mi midfielder hi a inlan theih loh chuan German club tan chânna a tling dawn.

Hetihlai hian Leverkusen winger Martin Terrier chu hliam vang thoin Bayern lakah lakchhuah a ngai a, mahse, coach Kasper Hjulmand chuan zaninah hman theih hram a tum dawn niin an sawi.

Arsenal hi league lama Everton hneh zo hlim an ni a, an boruak a ṭha rih hle. Mahse, he inkhelah hian player pawimawh Jurrien Timber chu lakchhuah a ngai a, zaninah a inlan theih dawn leh dawn loh a chiang lo.

Gunners-in Everton an hneh khan kum 16 mi Max Dowman chuan goal a khung a, Dowman chanchin an ngaihven luatah, inkhelh zawha Mikel Arteta-a'n press a hmachawnnaah Timber-a chungchang zawttu an awm lo tlat!

Arsenal-in player dang inhliam tharlam langsar sawi tur an nei lo a, an ṭhat dan berin London club hian Leverkusen an lo hmachhawn thei dawn. German club hian league stage-ah Manchester City an lo hneh tawh tih theihnghilh lo la.

Gunners hmabak hautak pawh chhut telsak a ṭul. Pathianni zanah London club hian League Cup final an khel zui leh dawn a, Mikel Arteta-a'n fing taka a naute a rem thiam a ṭul dawn.

Arsenal hian quadruple champion an la beisei zel a, UCL-ah phei chuan league stage-ah an tlawm miah lo! League stage-a tlawm lo team hian, 'fixture vannei' an tihsak hial khawpin Leverkusen an chang a, an tlawm a nih chuan a mualpho thlak khawp ang.