Milan-in Inter hnaih thei lo

Pathianni zan Serie A inkhelah AC Milan chuan 1-0 in Lazio an hneh lo a, Serie A hmahruaitu an hmelma Inter Milan hnaihna hun ṭha an bawhpelh. Lazio tan Gustav Isaksen-a'n goal a khung a, Milan-in chhanletna tur an nei lo.

Stadio Olimpico-a inkhelah mikhual team Milan an hlauhawm hmasa a, Pelvis Estupinan-a'n a tauh chu goal zawnah a tla lo hlauh a, Lazio an him.

Estupinan a chesual zui a, Ecuadorian defender hian ball a tauh ṭhelh a, ball kal zel chu Isaksen-a'n um lutin, Mike Maignan chauh a hmachhawn hnuah a pet goal.

Lazio an vanduai a, Kenneth Taylor-a'n goal ban a pet per bakah Daniel Maldini-a'n Maignan chauh a hmachhawn hnuah a pet goal thei lo.

Second half-ah Milan tan Christian Pulisic-a shot ṭha tak chu Lazio keeper Edoardo Motta-a'n a dansak a, Youssouf Fofana-a'n hnai tak aṭangin a tauh lut thei lo bawk.

Minute 75-naah Milan tan Zachary Athekame-a'n goal a khung a, mahse goal a khung dawnah Athekame hian a kuta ball a khawih fuh avangin sut leh a ni. Luka Modric leh Ardon Jashari ten chance nei mah se goal zawnah an pet thei lo.

Hun tawp thlengin goal dang a lut tawh lo a, an mikhualna ramah goal an khung theih loh avangin Milan an tlawm.

Milan hian Inter an chak zo lo tih hre sain an khel a, an chak chuan point an inthlauhna chu point ngaah an tihniam thei dawn. Mahse Massimiliano Allegri nauten goal an khung thei lo a, an hun ṭha neih an chhawr ṭangkai thei lo.