Barty duhsaktu Kerber

Tennis season an ṭan a, vawiin aṭang hian Brisbane International khelh a ni dawn. Angelique Kerber chuan world number 1 ni chunga season hman ṭan hautakzia a hria a, tun dinhmuna number 1 Ashleigh Barty chu ṭha taka khel nghal turin a duhsak.

Season hmasa khan Barty hian French Open nomawi a chawi a, a thiam zual pariat inelna WTA Finals-ah hlawhtlinna chang bawkin a chung bera awm chungin kum tawp a hmang.

Tun hma deuhin Kerber-i'n number 1 ni chunga season bul ṭanin beisei a phak lo; tun hnaiah Naomi Osaka pawh beisei angin a khel chhuak lo bawk - tunah chuan Barty chungah mipui mit a fu mek.

German nula Kerber chuan, "Barty hi chu player khauh leh ṭha tak a ni, anmahni ram ngeia season a hmang ṭan thei tur hi a vanneiin player tam takin an zawh loh pressure kha ani hi chuan a zawh ngei ka duhin duhsakna ka hlan," a ti.

Australian Open inbuatsaih nana an hman ṭhin Brisbane International-ah hian Kerber, Barty leh Osaka te bakah Maria Sharapova a inlan dawn a, hard court inelna hi mipui ngaihven hlawh a ni ang.