Chinese GP-ah Antonelli a chak

Chinese Grand Prix, Pathianni chhuna neihah Kimi Antonelli chu pakhatnaah thlengin a chak a, Italian driver hi a vawi khat chakna a ni. Antonelli hi kum 19 leh ni 202 mi a ni a, Formula One chanchina chak thei naupang ber dawttu niin, Max Verstappen chiah a tluk lo.

Shanghai International Circuit-a intlansiakah hian, Australian GP-a pakhatna George Russell chu pahnihna a ni ve thung a, Russell hian a Mercedes-a a teammate Antonelli hi second 5.5 chauhin a pha lo. Russell hnungah hian Lewis Hamilton thlengin pathumna a ni a, palinaah Charles Leclerc a thleng bawk.

Kum 41 mi Hamilton hian Ferrari a zawm hnuah a thlensan ber ṭum a tawng a, sprint race-ah lo chak tawh mahse intlansiak pangngaiah podium a thlen vawi khatna a ni.

Mercedes driver pahnih Antonelli leh Russell te hian Inrinni chhuna sprint weekend an hman aṭang tawhin an che ṭha tawh a, pakhatnaah Russel thlengin, pahnihnaah Antonelli a thleng a, Chinese GP-ah an dinhmun a inthlak chiah thung.

Hetihlai hian World champion Lando Norris leh Max Verstappen ten position an nei lo a, Dutch driver Verstappen chuan lap 10 tlan tur a la awm tihah a car a chhia a, a tawp a thleng zo lo. Norris phei hi chuan electric lam buainaa tawh avangin inelna a hmachhawn lo hrim hrim.

McLaren tan Chinese GP hi chhinchhiah tlak a ni lo a, mechanical lam fel lo avangin Oscar Piastri chu inelna a hmachhawn phalsak a ni lo bawk.

March 29, Pathianni zing dar 10:30-ah Japanese Grand Prix neih chhunzawm a ni leh dawn a, Japanese GP hi FIA thuneitute chuan indona avanga buainain a nghawng ve dawn lo niin an sawi.

Tun hnaiah Middle East-ah US, Israel leh Iran inkara buaina a tam hle a, an inbeihna avang hian a ṭhenawm ram dangah te a kangkai lo thei lo a, United Arab Emirates, Kuwait, Saudi Arabia, Qatar, leh Bahrain-te chuan Iran missile-in a target zingah a tel niin an tarlang bawk.

Formula 1 chuan thil thlen dan chu uluk takin an en dik ve reng a, April thlaah harsatna awm loin Bahrain leh Saudi Arabia-ah inelna buatsaih tum hle mah se an ṭhulh leh ta zawk.