Zanin MSL a hmuhnawm dawn

Mizoram Super League boruak a sang zel a, league round khelh zawh a ni dawn tawh a, club tinte dinhmun a chiang ṭep. Zanin dar 5:30-ah Chhinga Veng BC leh Zemabawk BC te an inhmachhawn dawn a, dar 8:30-ah Mission Veng Hotshots leh Khatla TBL te an inkhel dawn bawk.

Chhinga Veng vs Zemabawk

MSL-a vawi khat nana inlan Chhinga Veng BC ten beisei an pha lo a, match ruk khel tawhin vawi khat chiah an chak a, an tan semifinal luhna kawngka a inkhar tawh.

Hetiang boruak karah hian zaninah semifinal luh inbeisei Zemabawk BC nen an inkhel dawn a, ZBBC hi tun hnaiah an harh thar avangin Chhinga Veng BC tan tum an châkawm hran lo ang.

Zemabawk BC tan Pratyanshu Tomar-a'n a teammate te bakah fans te phurna a pe a, Tomar hi match Zemabawk match hmasa lamah inlan thei se an dinhmun a danglam hial ang.

Tomar bakah Carl James Snyder-a'n hma a sawn a, an Mizo player - Malsawmkima (Tyson), Lallianmawia, K. Lalthianghlima leh Lalropuia te an ṭangkai ṭhin a, Chhinga veng lakah chak an tum a nih chuan an pawimawh leh dawn.

Liansangpuia naute hi nizan khan Tuikual South BC nen an inhmachhawn a, an result kan hre hman lo. A ni zawna an khelh dawn avangin an chau dawn a, Chhinga Vengin pressure awm loa an khelh dawn avangin Zemabawk-in an zuam sual thei.

Hotshots vs TBL

MSL-a an rawn let hnuah Hotshots an puak ring a, match rukah vawi li hnehna an chang thei. An foreigner Darnell Johnson a hmuhnawm a, tun season MSL-ah ram pawn player che ṭha bera chhal ngam a ni.

Johnson thlawp tu Lalruatkima, Japjit Singh Gill te an ṭangkai bawk a, TBL hneh an tum a nih chuan an theihtawp chhuaha an khelh a ngai.

Hetihlai hian an match hmasa berah chak lo mah se TBL an insiamṭha tawh a, Saron an hneh loh hnu match liah an chak vek.

TBL tan Emmanuel VL Awmpuia leh Vanlalṭhazuala te an pawimawh a, season dang aiin TBL tlahniam deuh mah se a khaidingtu pawimawh an ni a, zaninah pawh an inghahna an ni leh dawn.