Barca president atan Laporta a tling nawn

Spanish club lian Barcelona president inthlanah Joan laporta a tling nawn a, kum nga chhung atan Barca president a ni leh dawn.

Inthlan hi March 15, Pathianni khan neih a ni a, Laporta hian 68% vote a hmu a, a khingpui Victor Font chuan 30% a hmu thung. Vote dang zawng hi Toni Freixa vote hmuh leh vote thi a ni.

Kum 63 mi Laporta chuan, "He club hi club ropui tak a ni a, member-ten club president leh board an thlanna hmun a ni a, club danglam bik a ni.

Kan hmaah hian kum duhawm takin min hmuak a, club-in a hun tawn tawha hlimawm leh ropui ber a tawng dawn a ni," a ti a, a phur hle.

Barca president chuan first team chu a ṭha thei ang bera thuam chak a, Nou Camp stadium siam ṭhat chu zawh fel a tum a, a term thara official leh fans te chuan Barca chu thil engkim lakah an hum zel dawn niin a sawi.

Inthlan laiin Laporta sawiselna a awm zeuh zeuh a, a duh lotu zingah club legend Xavi pawh a tel. Xavi hian Barca-ah Lionel Messi a let theih loh chhanah Laporta a puh a, tling lo turin duh mah se Laporta a tling ta tho.

Laporta hian 2003-2010 khan president-ah thlan tlin a lo ni tawh a, March 2021 khan thlan nawn leh niin 2031 thleng president hna hi a chelh ang.